كەنتاۋ دەسە الدىمەن ۇنەمى جىلۋ ماسەلەسى ايتىلاتىن. بۇل ماسەلەنى شەشۋدە قالاعا «كوگىلدىر وتىن» جەتكىزۋ ماڭىزدى ەدى. وبلىس باسشىلىعى وسى باستامانى قىسقا مەرزىمدە ورىنداۋعا كۇش سالىپ, قارجى ماسەلەسىن شەشىپ, كومپانيالارمەن كەلىسسوز جۇرگىزدى. ناتيجە بار. جوبانى جۇزەگە اسىرۋدا وتە كۇردەلى ءارى اۋقىمدى جۇمىس اتقارىلدى.
وبلىس ورتالىعىنىڭ ىرگەسىندەگى كەنتاۋ قالاسىنىڭ تۇرعىندارى كوپتەن كۇتكەن ماسەلە شەشىلىپ, قالاعا گاز بەرىلدى. قازىرگى تاڭدا «كوگىلدىر وتىنمەن» قالانىڭ 18 200 ابونەنتى قامتىلدى. قالعان تۇرعىندار كەزەڭ-كەزەڭىمەن كۇز ايلارىنا دەيىن قوسىلا باستايدى. ەندى الداعى 2 جىلدا قالاعا قاراستى قالعان 4 اۋىلعا تابيعي گاز تارتىلادى دەپ كۇتىلۋدە. كەنتاۋ قالاسىنىڭ اكىمى راشيد ايۋپوۆ قالانى گازداندىرۋ بويىنشا تىنىمسىز جۇمىس ىستەگەن جۇمىسشىلاردىڭ ەڭبەگىن باعالاپ, قۇرمەت كورسەتتى.
«ۋاقىتپەن ساناسپاي, قالاعا گاز كىرگىزۋ جۇمىسىن كۇندىز-ءتۇنى توقتاۋسىز جۇرگىزگەن ەڭبەكتەرىڭىز وراسان. تىندىرىمدى تىرلىكتەرىڭىز ارقىلى گاز قالاعا ءبىز جوسپارلاعان ۋاقىتتان ەرتە قوسىلدى. مۇنىڭ بارلىعى دا ەڭبەكتىڭ ارقاسى», دەدى قالا اكىمى.
ال وبلىس اكىمى ومىرزاق شوكەەۆ كەنتاۋداعى ش.قالداياقوۆ اتىنداعى مادەنيەت سارايىندا تۇرعىندارمەن كەزدەسۋدە مونوقالانىڭ باسەكەگە قابىلەتتىلىگى ارتاتىنىن, وعان تولىق مۇمكىندىك بارىن اتاپ ءوتتى. سونداي-اق بۇل كۇنى كەنتاۋ قالاسىنداعى Turkistan ارنايى ەكونوميكالىق ايماعىندا ورنالاسقان «تۇركىستان تەمىربەتون» زاۋىتى ءوز جۇمىسىن باستادى. ءوندىرىس ورنى تۇرعىن ۇيگە ارنالعان 10-عا جۋىق ءتۇرلى تەمىربەتون ونىمدەرىن شىعارادى. ايتا كەتەيىك, ينۆەستيتسيانىڭ جالپى كولەمى – 1,2 ملرد تەڭگە, وسى ساتكە دەيىن 700 ملن تەڭگە ورىندالعان. جاڭا 60 جۇمىس ورنىن اشۋ جوسپارلانعان. زاۋىتتا جابىندىلار, ريگەل, ۇيلەردىڭ ىرگە تاسىن قالاۋعا ارنالعان بلوكتار, باعانالار, جول بويىنا قويىلاتىن بورديۋرلەر شىعارىلماق. زاۋىتتىڭ جوبالىق قۋاتتىلىعى – جىلىنا شامامەن 80 مىڭ شارشى مەتر تەمىربەتون. شيكىزاتتىڭ باسىم بولىگى كەنتاۋ قالاسىنان الىنادى. شىعارىلعان ونىمدەرمەن تۇركىستان وبلىسىن قامتۋ جوسپارلانۋدا.
جاڭا زاۋىتتىڭ جۇمىسىنا ساتتىلىك تىلەگەن وبلىس اكىمى ومىرزاق شوكەەۆ ءوندىرىستى دامىتۋ باعىتىندا جۇمىس كۇشەيەتىنىن ايتتى. «بىلتىر ەكونوميكانىڭ دامۋ قارقىنى +4%-دى قۇرادى, ونەركاسىپ ءونىمىنىڭ كولەمى 3,6%-عا ارتىپ, 707,8 ملرد تەڭگەنى قۇرادى. 186,6 ملرد تەڭگەنى قۇرايتىن 34 ينۆەستيتسيالىق جوبا ىسكە قوسىلدى. جالپى, وبلىس ورتالىعىنىڭ تۇركىستان قالاسىنا اۋىسۋى كەنتاۋدىڭ دامۋىنا ۇلكەن سەرپىن بەردى. بۇل شاھار مەن ءۇشىن وتە ىستىق. ماسەلەلەرىن دە جاقسى بىلەمىن. سوندىقتان ونى دامىتۋ – ازاماتتىق پارىزىم. وتكەن جىلى كەنتاۋ قالاسىن دامىتۋعا 1,3 ملرد تەڭگە قارجى ءبولىندى. كوپقاباتتى ۇيلەر جاڭعىرتۋدان ءوتتى. «قىزىلاسكەر» اۆتوماتتاندىرىلعان گاز ستاساسىن ىسكە قوسۋ جۇمىستارى اياقتالىپ, قالا تۇرعىندارىن تابيعي گازعا قوسۋ مۇمكىندىگى پايدا بولدى. شاحتانىڭ سۋىن تومەندەتۋ جۇمىستارى جۇرگىزىلۋدە. بيىل قالانى دامىتۋعا 1,6 ملرد تەڭگە باعىتتالىپ وتىر. كەنتاۋ قالاسى اۋماعىنداعى الەۋمەتتىك-ينفراقۇرىلىمدىق ماسەلەلەردى جۇيەلى تۇردە كەزەڭىمەن شەشەتىن بولامىز», دەدى ءو.شوكەەۆ.
كەزدەسۋدە تۇرعىندار ينفراقۇرىلىم, ونوماستيكا, جۇمىس ورىندارىن كوبەيتۋ, جول, باسپانامەن قامتۋ, بالالار ويىن الاڭشالارىن سالۋ, جاستاردى «سەرپىن» باعدارلاماسىنا ەنگىزۋگە ىقپال ەتۋ جانە وزگە دە ماسەلەلەردى كوتەردى. وبلىس اكىمى تۇرعىنداردىڭ وتىنىشتەرى مەن سۇراقتارىن تىڭداپ, زاڭ اياسىندا كەڭەس بەردى. بىرقاتار تۇيتكىلدى شەشۋ بويىنشا جاۋاپتى باسقارما باسشىلارى مەن قالا اكىمىنە ناقتى مىندەتتەر جۇكتەدى.
تۇركىستان وبلىسى