ۇلتتىق بانك توراعاسى عالىمجان ءپىرماتوۆ جىل باسىنان بەرى بانكتىڭ التىن-ۆاليۋتا اكتيۆتەرى 1,2 ميلليارد دوللارعا ازايعانىن ايتتى, دەپ حابارلايدى Egemen.kz.
ونىڭ ايتۋىنشا, بانكتىڭ جالپى حالىقارالىق رەزەرۆتەرى 2022 جىلعى 31 ناۋرىزداعى جاعداي بويىنشا 85,9 ميلليارد دوللار.
«ۇلتتىق بانكتىڭ التىن-ۆاليۋتا اكتيۆتەرى جىل باسىنان بەرى ۆاليۋتالىق ينتەرۆەنتسيالار, ەكىنشى دەڭگەيلى بانكتەر شوتتارىنداعى قالدىقتاردىڭ ازايۋى جانە سىرتقى قارىز بويىنشا تولەمدەر ەسەبىنەن 1,2 ميلليارد دوللارعا ازايىپ, 33,2 ميلليارد دوللاردى قۇرادى», دەدى ع. ءپىرماتوۆ.
ۇلتتىق قوردىڭ اكتيۆتەرى 52,7 ميلليارد دوللار. «رەسپۋبليكالىق بيۋدجەتكە 1 036 ميلليارد تەڭگە كولەمىندە ترانسفەرتتەر ءبولۋ ماقساتىندا 2022 جىلدىڭ ءبىرىنشى توقسانىندا 2,1 ميلليارد دوللارعا ۆاليۋتالىق اكتيۆتەر ساتىلدى.مۇناي باعاسىنىڭ ايتارلىقتاي ءوسۋى اياسىندا ۇلتتىق قورعا تۇسەتىن تۇسىمدەر جىل باسىنان بەرى 1 059 ميلليارد تەڭگەنى قۇراپ, وتكەن جىلدىڭ سايكەس كەزەڭىمەن سالىستىرعاندا ءتورت ەسەگە جۋىق ءوستى, ونىڭ ىشىندە ۆاليۋتالىق تۇسىمدەر 1,9 ميلليارد دوللاردى نەمەسە بالامادا 845 ميلليارد تەڭگەنى قۇرادى», دەدى ول.
ايانا توعانبەك