زاماناۋي ماماندىقتار اتلاسى مەگاپوليس ەرەكشەلىكتەرىن ەسكەرە وتىرىپ جاسالاتىن بولادى. اگلومەراتسيا ورتالىعىندا جاڭا كاسىپ يەلەرىنە قاجەتتىلىكپەن قاتار تەحنولوگيالىق ماماندىقتاردى ۋاقىت وزدىرماي يگەرۋدىڭ ماڭىزى زور.
وسى ورايدا الماتى قالالىق ءبىلىم باسقارماسى باسشىسىنىڭ ورىنباسارى قايرات جۇمانوۆ جاڭا ماماندىقتار اتلاسىنىڭ ازىرلەنەتىنىنەن حاباردار ەتىپ, قوعامدا جاڭا كاسىپ تۇرلەرىنە سۇرانىس ارتىپ كەلەتىنىن جەتكىزدى. جاڭا ماماندىقتار اتلاسىن ازىرلەۋ بارىسىندا وڭىرلىك ءارى تەحنيكالىق جانە كاسىپتىك باعدارداعى بارلىق تالاپ باسشىلىققا الىنادى. قازىر قالا اكىمدىگى جانىنداعى كوميسسيا ەڭبەك نارىعىندا سۇرانىسقا يە ماماندىقتاردىڭ تىزبەسىن جاساۋ ۇستىندە. وسى جىلدىڭ 30 ساۋىرىنەن باستاپ مەملەكەتتىك تاپسىرىس قاراستىرىلعان ماماندىقتار تۋرالى اقپارات ءبىلىم باسقارماسىنىڭ سايتىندا جاريالانادى.
الماتىنىڭ 20 مەملەكەتتىك كوللەدجىندە 2019 جىلدىڭ قاڭتارىنان باستاپ جان باسىنا قارجىلاندىرۋ ەنگىزىلدى. ال بيىلعى قاڭتاردان باستاپ 29 جەكەمەنشىك كوللەدج مەملەكەتتىك تاپسىرىس اياسىندا جۇمىس ىستەۋدە. مەملەكەتتىك تاپسىرىستى تەحنيكالىق ماماندىقتارعا قايتا باعدارلاۋ تۋرالى تاپسىرما اياسىندا بيىل ستۋدەنتتەردىڭ 60 پايىزى كوللەدجدەرگە تەگىن قابىلدانادى. وسىلايشا, 2025 جىلعا قاراي 9-سىنىپ تۇلەكتەرىنىڭ ءجۇز پايىزى كوللەدجدەردە قاجەتتى ماماندىقتاردا تەگىن وقىماق. ياعني مەملەكەتتىك تاپسىرىستى ەكى ەسەگە – 21 مىڭ ورىنعا دەيىن ۇلعايتۋ كوزدەلىپ وتىر. بۇگىندە مەگاپوليستە 83 كوللەدج جۇمىس ىستەيتىن بولسا, ونىڭ 23-ءى مەملەكەتتىك, 60-ى جەكەمەنشىككە جاتادى. ءبىلىم مەكەمەلەرىندەگى 73 719 ستۋدەنتتىڭ 36,5 مىڭى مەملەكەتتىك تاپسىرىس بويىنشا ءبىلىم الۋدا. ياعني تەگىن بىلىممەن قامتاماسىز ەتۋ 49,5 پايىزدى قۇرايدى. ال ستۋدەنتتەردىڭ 3 مىڭنان استامى – سىرتتان كەلىپ وقيتىندار. ستۋدەنتتەرگە ارنالعان 30-عا جۋىق جاتاقحانا بار.
الداعى وقۋ جىلىنا 20 ماۋسىمنان باستاپ قۇجاتتار قابىلداۋ باستالاتىنىن نازارعا الساق, ءار تالاپكەردىڭ 4 ماماندىق پەن 4 كوللەدجدى تاڭداۋعا مۇمكىندىگى بار.
كوللەدجدەرگە بەرىلگەن اكادەميالىق دەربەستىككە بايلانىستى ءبىلىم بەرۋ مەرزىمى وندىرىستىك كاسىپورىندارمەن كەلىسىلگەن ناقتى ءبىلىم بەرۋ باعدارلامالارىنا جانە جۇمىس بەرۋشىلەرگە قاجەتتى وقىتۋ ناتيجەلەرىنە بايلانىستى انىقتالادى. بۇگىندە كوللەدجدەر جۇمىس بەرۋشىلەرمەن بىرلەسىپ, ءبىلىم بەرۋ باعدارلامالارىنىڭ مازمۇنىن, وقۋ مەرزىمدەرىن دەربەس ايقىنداۋ مۇمكىندىگىنە يە. سونىمەن قاتار الماتىنىڭ بارلىق مەملەكەتتىك كوللەدجىندە يندۋستريالدى كەڭەستەر قۇرىلىپ, ءبىلىم بەرۋ باعدارلامالارىن ازىرلەۋگە قاتىساتىن جۇمىس بەرۋشىلەردىڭ پۋلى ارتىپ كەلەدى. مىسالى, اعىمداعى جىلدىڭ اقپان ايىندا وقۋ ورىندارى, كاسىپورىندار جانە ءبىلىم باسقارماسى اراسىندا جاسالعان ءۇش جاقتى مەموراندۋم نەگىزىندە 22 مەملەكەتتىك كوللەدجدى ءىرى كاسىپورىندار قامقورلىققا العان. كوللەدجدەرگە قامقورلىق كورسەتەتىن سەرىكتەستەردىڭ قاتارىندا اباي اتىنداعى قازۇپۋ, قازاق ۇلتتىق قىزدار پەداگوگيكالىق ۋنيۆەرسيتەتى, س.اسفەندياروۆ اتىنداعى قازۇمۋ, «كازسپو-N» جشس, «ۇەۇ «DOSTI» كومپانيالار توبى جشس, «Crown» جشس, «قازاقستان» قوناقۇيى, «كازلەگپروم-الماتى» جشس, «الماتىەنەرگوسەرۆيس» جشس, «MEGA موتورس» جشس, «الماتى ەلەكترومەحانيكالىق زاۋىتى» جشس, «مەحەلەكترومونتاج» جشس, «قتج – جۇك تاسىمالى» جشس سياقتى كاسىپورىندار بار. سونىمەن قاتار دۋالدى وقىتۋ بويىنشا 48 كوللەدج 361 كاسىپورىنمەن بىرلەسىپ جۇمىس ىستەپ كەلەدى. وندا 41 ماماندىق بويىنشا 7 مىڭنان استام ستۋدەنت ءبىلىم الۋدا. ال «جاس مامان» جوباسى اياسىندا 2020-2021 جىلدارى 18 كوللەدج رەسپۋبليكالىق جانە جەرگىلىكتى بيۋدجەت قاراجاتى ەسەبىنەن زاماناۋي قۇرىلعىلارمەن جابدىقتالسا, 2015 جىلدان باستاپ كوللەدجدەر جۇمىسشى ماماندىقتارىنىڭ بەدەلىن ارتتىرۋ جانە الەمدە كاسىبي ءبىلىم بەرۋدى دامىتۋدى ماقسات ەتەتىن WorldSkills حالىقارالىق كوممەرتسيالىق ەمەس قوزعالىسىنىڭ تۇراقتى قاتىسۋشىسى رەتىندە زاماناۋي داعدىلاردى يگەرۋگە مۇمكىندىك العان.
الماتى