پرەمەر-ءمينيستردىڭ ورىنباسارى پرەزيدەنتكە حالىقتىڭ تابىسىن ارتتىرۋ باعدارلاماسىنىڭ جۇزەگە اسىرىلۋ بارىسى تۋرالى مالىمەت بەردى, دەپ حابارلايدى Egemen.kz اقورداعا سىلتەمە جاساپ.
ەرالى توعجانوۆ قاسىم-جومارت توقاەۆقا جالاقىنى كوتەرۋ ءىسىنىڭ 1 ميلليوننان استام بيۋدجەتتىك سالا قىزمەتكەرلەرى مەن كۆازيمەملەكەتتىك سەكتوردىڭ وندىرىستىك پەرسونالىن قامتيتىنىن حابارلادى. سونداي-اق كاسىپكەرلىككە مىندەتتەمەلەر بەلگىلەۋ ارقىلى مەملەكەتتەن كومەك الاتىن ءىرى بيزنەستەگى 2,8 ميلليون قىزمەتكەردىڭ ەڭبەك تابىسىن ارتتىرۋ قاراستىرىلعان.
مەملەكەت باسشىسىنا كاسىپكەرلىك قىزمەتتىڭ تابىسىن ارتتىرۋعا, سونداي-اق فارماتسەۆتيكا, بيوتەحنولوگيا, IT-تەحنولوگيا جانە مۇناي-حيميا باعىتىنداعى جاڭا وندىرىستەر سياقتى ەكونوميكانىڭ ءتۇرلى سالالارىنداعى ينۆەستيتسيالىق جوبالاردى ىسكە اسىرۋ ارقىلى جاڭا جۇمىس ورىندارىن اشۋعا قاتىستى ۇكىمەتتىڭ جوسپارى باياندالدى.
سونىمەن قاتار ەرالى توعجانوۆتىڭ ايتۋىنشا, حالىقتىڭ الەۋمەتتىك جاعدايى تومەن توپتارىن قولداۋ شارالارى قاراستىرىلعان. ماسەلەن, «باقىتتى وتباسى» جوباسى اياسىندا كوپبالالى جانە مۇمكىندىگى شەكتەۋلى بالالاردى تاربيەلەپ وتىرعان 20 مىڭ ايەل جۇمىسپەن قامتىلادى. جاستاردى جۇمىسقا ورنالاستىرۋ ءۇشىن «جاستار تاجىريبەسى» جانە «العاشقى جۇمىس ورنى» جوبالارى جۇزەگە اسىرىلىپ, 400 ايلىق ەسەپتى كورسەتكىشكە دەيىن گرانتتار بەرىلەدى.
كەزدەسۋ سوڭىندا پرەزيدەنت حالىقتىڭ تابىسىن ارتتىرۋدىڭ ايرىقشا ماڭىزدى ەكەنىن اتاپ ءوتىپ, ۇكىمەتكە بۇل ماسەلەنى ەرەكشە باقىلاۋدا ۇستاۋدى تاپسىردى.