ەلوردا تۇرعىندارى قالاداعى بوتانيكالىق باقتىڭ سۋ قويماسىندا ءولى بالىقتىڭ جينالعانىنا الاڭداۋشىلىق ءبىلدىردى. قالا اكىمدىگى بۇل ماسەلەگە قاتىستى تۇسىنىكتەمە بەردى, دەپ حابارلايدى Egemen.kz.
بالىقتاردىڭ سۋرەتتەرىن سامال يبراەۆا ەسىمدى جەرگىلىكتى تۇرعىن Facebook پاراقشاسىنا جاريالاعان.
«بوتانيكالىق باقتاعى توعان جاساندى, ياعني ول تەك سۋارۋ جۇيەسىنىڭ, سۋبۇرقاقتىڭ قىزمەتىنە ارنالعان. ەسىل اۋدانىنىڭ اكىمدىگى جاساندى سۋ ايدىنىندا بالىق وسىرىلمەيتىنىن ەسكەرتەدى. سەبەبى بۇل سۋ ايدىنى بالىقتاردىڭ تىرشىلىگىنە ارنالماعان. بالىق شاباقتارى مۇندا نۇرا كانالى ارقىلى تابيعي تۇردە كەلگەن بولۋى مۇمكىن», دەلىنگەن اكىمدىك حابارلاماسىندا.
سونىمەن قاتار اكىمدىك توعاننىڭ تەرەڭدىگى 0,5 مەتردەن 3,5 مەترگە دەيىن ەكەنىن ەسكەرە وتىرىپ, سۋ قويماسى تولىعىمەن قاتىپ قالاتىنىن ءتۇسىندىردى.
«كۇن جىلىنعان كەزدە اۋدان اكىمدىگى سۋ قويماسىن تازارتۋ جۇمىستارىن باستايدى», دەدى اكىمدىك وكىلدەرى.