قازاقستان مەن يرلانديا ديپلوماتيالىق قاتىناستارىنا 30 جىل. ەكى ەل سىندارلى ساياسي قارىم-قاتىناس, ءوزارا ءتيىمدى ساۋدا-ەكونوميكالىق ارىپتەستىك ورناتىپ, مادەني-گۋمانيتارلىق بايلانىستاردى ايتارلىقتاي كەڭەيتتى, دەپ حابارلايدى Egemen.kz قر سىرتقى ىستەر مينيسترلىگىنە سىلتەمە جاساپ.
نۇر-سۇلتان مەن دۋبلين بۇۇ جانە ەقىۇ شەڭبەرىندە ءتيىمدى ىقپالداسادى, دەموكراتيا, ادام قۇقىقتارى مەن زاڭ ۇستەمدىگى سياقتى امبەباپ قۇندىلىقتاردى ۇستانادى. يرلانديا 2017-2018 ج.ج. بۇۇ قاۋىپسىزدىك كەڭەسىنىڭ تۇراقتى ەمەس مۇشەلىگىنە قازاقستاننىڭ كانديداتۋراسىن قولدادى, ال قازاقستان 2021-2022 ج.ج. بۇۇ قاۋىپسىزدىك كەڭەسىنە يرلانديانىڭ كانديداتۋراسىنا داۋىس بەردى.
يرلانديا – ەكونوميكاسى قارقىندى دامىپ كەلە جاتقان ەل. يننوۆاتسيا جاعىنان ەڭ الدىمەن اتالاتىن 15 مەملەكەتتىڭ قاتارىنا كىرەدى. وندا وزىق IT كومپانيالاردىڭ ەۋروپا شتاب-پاتەرلەرى ورنالاسقان: Apple, Google, Facebook, Amazon, IBM, Microsoft, Ebay, Oracle جانە باسقالارى. قازاقستان IT دامىتۋ بويىنشا يرلانديانىڭ تاجىريبەسىنە, سونداي-اق ەلگە ترانسۇلتتىق كومپانيالاردى تارتۋ مەن تولىققاندى جۇمىس ىستەۋ ءۇشىن جاعداي جاساۋعا مۇددەلى. وسى رەتتە, 2018 جىلى «زەردە» ۇيح اق جانە «ازاماتتارعا ارنالعان ۇكىمەت» اق وكىلدەرىنىڭ دۋبلين قالاسىنا ءىسساپارى ۇيىمداستىرىلىپ, ونداعى تەحنولوگيالىق كومپانيالارمەن كەزدەسۋلەر وتكىزىلدى.
ەكى ەلدىڭ ۇكىمەتتەرى اگروونەركاسىپتىك كەشەندە ىنتىماقتاستىققا دايىن ەكەندەرىن ءبىلدىرىپ وتىر. يرلانديا - ەۋروپاداعى سيىر ەتى مەن ءسۇت ونىمدەرىنىڭ ءىرى ەكسپورتتاۋشىسى. وسى ورايدا, «QazIndustry» قازاقستاندىق يندۋستريا جانە ەكسپورت ورتالىعى» اق مەن «International Development Ireland» يرلانديا ۇلتتىق كومپانياسى 2019 جىلى 50 ملرد. تەڭگە كولەمىندەگى ينۆەستيتسيالىق جوبالاردى جۇزەگە اسىرۋ جونىندە مەموراندۋمعا قول قويدى.
ىنتىماقتاستىقتىڭ كەلەشەگى مول سالالارىنا قارجى سەكتورى دا جاتادى. بۇل باعىتتا ءتيىستى جۇمىستار جۇرگىزىلىپ جاتىر. وتكەن جىلى «استانا» حالىقارالىق قارجى ورتالىعى مەن يرلانديانىڭ ورتالىق بانكى ينۆەستورلاردى قورعاۋ, نارىقتىق جانە قارجىلىق تۇتاستىقتى نىعايتۋ, سەنىم مەن قارجىلىق تۇراقتىلىقتى قولداۋ ماسەلەلەرىندە ءوزارا ارەكەتتەستىككە باعىتتالعان قۇجاتقا قول قويدى.
ەكى ەل اراسىنداعى تاۋار اينالىمى 2021 جىلى شامامەن 140 ملن. اقش دوللارى كولەمىندە بولدى. بۇل - الدىڭعى جىلمەن سالىستىرعاندا 14,2% ارتىق. قازاقستاندا يرلانديا كاپيتالىنىڭ قاتىسۋىمەن 40 كومپانيا جۇمىس ىستەيدى. يرلانديادان كەلگەن تىكەلەي شەتەل ينۆەستيتسيالارىنىڭ جالپى كولەمى - 130 ملن. اقش دوللارى.
يرلانديانىڭ ءبىلىم بەرۋ جۇيەسى دە قىزىعۋشىلىق تۋدىرادى, سەبەبى ول جوعارى ساپالى ماماندار مەن وقىتۋشىلار دايىنداۋدا بەرىك بەدەلگە يە. جاقىندا قازاقستانداعى ورتا مەكتەپتەردىڭ اعىلشىن ءتىلى وقىتۋشىلارىنا ارنالعان تەگىن ونلاين-ءبىلىم بەرۋ كۋرستارىن وتكىزۋ بويىنشا بىرلەسكەن جوبا اياقتالدى, ونىڭ شەڭبەرىندە شامامەن 4 مىڭ وقىتۋشى ءبىلىمىن شىڭدادى.
ءوزارا ارەكەتتەستىكتىڭ قازىرگى جاعدايى ەكى ەلدىڭ ساياسي, ەكونوميكالىق جانە مادەني قاتىناستارىن ودان ءارى نىعايتۋعا ۇمتىلىسىن كورسەتەدى.