رەسەيدەن تاجىكستانعا باعىت العان ۇلكەن جۇك كولىگى تۇركىستان وبلىسىنداعى تاس جولدا وتقا وراندى, دەپ حابارلايدى Egemen.kz تۇركىستان وبلىستىق پد ءباسپاسوز قىزمەتىنە سىلتەمە جاساپ.
9 ساۋىردە ساعات 21: 00 شاماسىندا بايدىبەك اۋداندىق پوليتسيا ءبولىمىنىڭ «102» پۋلتىنە جيەنقۇم اۋىلىنىڭ جانىنداعى سامارا – شىمكەنت تاس جولىنىڭ 73 شاقىرىمىندا جۇك كولىگى ورتەنىپ جاتقانى تۋرالى حابارلاما كەلىپ ءتۇستى.
وقيعا ورنىنا اۋداندىق ءبولىمنىڭ جەدەل-تەرگەۋ توبى شىقتى.
رەسەيدەن تاجىكستانعا باعىت العان Volvo جۇك كولىگى تىركەمەسىنىڭ باللونى ورتەنگەنى بەلگىلى بولدى.
وزدىگىنەن وت تۇتانۋ سالدارىنان ۇلكەن جۇك كولىگى ۇستىندەگى تۇرمىستىق تەحنيكادان تۇراتىن جۇگىمەن قوسا تولىقتاي ورتەندى. زارداپ شەككەندەر جوق, تەك ماتەريالدىق شىعىن تىركەلدى. جۇرگىزۋشى تەك قۇجاتتارىن الىپ ۇلگەرگەن. ءورت ءسوندىرىلدى. جولدار اشىق.
بۇل فاكت بايدىبەك اۋداندىق پوليتسيا بولىمىندە تىركەلدى. پوليتسەيلەر وقيعانىڭ ءمان-جايىن انىقتاپ جاتىر.