قازاقستاندا 2025 جىلعا قاراي ەلدىڭ ءاربىر ەكىنشى تۇرعىنى سپورتپەن شۇعىلدانادى دەپ بولجانۋدا, دەپ حابارلايدى Egemen.kz.
بۇل ماقساتقا قالاي جەتۋگە بولاتىندىعى قر مادەنيەت جانە سپورت ءمينيسترى داۋرەن اباەۆتىڭ توراعالىعىمەن قاراعاندىدا كوشپەلى جيىندا ايتىلدى. بۇل باسقوسۋعا قاراعاندى وبلىسىنىڭ اكىمى جەڭىس قاسىمبەك, باسقا وبلىستار مەن نۇر-سۇلتان, الماتى, شىمكەنت قالالارى اكىمدەرىنىڭ ورىنباسارلارى جانە وبلىستاردىڭ دەنە شىنىقتىرۋ جانە سپورت باسقارمالارىنىڭ باسشىلارى قاتىستى.
«قاراعاندى ەل ايماقتارىنداعى سپورت سالاسىنىڭ جاي-كۇيى مەن قاجەتتىلىكتەرىن زەرتتەۋدىڭ باستاپقى نۇكتەسى بولىپ تابىلادى. بۇل جۇمىس مەملەكەت باسشىسىنىڭ تاپسىرماسى بويىنشا جۇزەگە اسىرىلۋدا. باستى ماقسات – وتاندىق سپورتتى دامىتۋدىڭ كەشەندى جوسپارىن قالىپتاستىرۋ. بۇقارالىق جانە بالالار سپورتىن دامىتۋدى ەرەكشە اتاپ ءوتۋ قاجەت. تاعى ءبىر باسىم باعىت – اۋىلدىق ءبىلىم بەرۋ مەكەمەلەرىن تارتا وتىرىپ, كوماندالىق سپورت تۇرلەرىنەن ۇلتتىق مەكتەپ جانە ستۋدەنتتىك ليگالاردى دامىتۋ», دەدى داۋرەن اباەۆ.
سپورت جانە دەنە شىنىقتىرۋ ىستەرى كوميتەتىنىڭ توراعاسى سامات ەرعاليەۆ 2022 جىلدىڭ مامىر ايىنان باستاپ بىرقاتار وڭىرلەردە «قولجەتىمدى سپورت» جوباسىن جۇزەگە اسىرۋ باستالاتىنىن ايتتى. اتالمىش جوبا ەلوردادا ءوزىنىڭ تيىمدىلىگىن كورسەتىپ ۇلگەردى.