2022 جىلعى 1 ساۋىردەگى جاعداي بويىنشا مەملەكەتتىك ەڭبەك ينسپەكتورلارى رەسپۋبليكانىڭ 230 كاسىپورنىندا 4,4 مىڭ جۇمىسكەردىڭ الدىندا 866,4 ملن تەڭگەدەن استام سوماعا جالاقى بويىنشا بەرەشەك بارىن انىقتادى, دەپ حابارلايدى Egemen.kz ەڭبەك جانە حالىقتى الەۋمەتتىك قورعاۋ مينيسترلىگىنىڭ ءباسپاسوز قىزمەتىنە سىلتەمە جاساپ.
«وسى كاسىپورىنداردىڭ باسشىلارىنا ورىندالۋى مىندەتتى 134 نۇسقاما بەرىلىپ, 27 ملن تەڭگەدەن استام سوماعا ايىپپۇل سالىندى. قابىلدانعان شارالار, سونىڭ ىشىندە جالاقى بويىنشا بەرەشەكتى وتەۋدىڭ قاتاڭ كەستەلەرى مەن مەرزىمدەرىن بەلگىلەۋ ناتيجەسىندە 3,2 مىڭنان استام جۇمىسكەردىڭ قۇقىقتارى قورعالدى. ولارعا 752,7 ملن تەڭگە تولەندى», دەپ جازىلعان حابارلامادا.