اتىراۋ ينجەنەرلىك-گۋمانيتارلىق ينستيتۋتى باس ليتسەنزياسىنان ايىرىلدى. مۇنداي شەشىمدى اتىراۋ وبلىسىنىڭ مامانداندىرىلعان اۋدانارالىق اكىمشىلىك سوتى شىعاردى, دەپ حابارلايدى Egemen.ءkz بىلىم جانە عىلىم سالاسىنداعى ساپانى قامتاماسىز ەتۋ كوميتەتىنىڭ ءباسپاسوز قىزمەتىنە سىلتەمە جاساپ.
قر بعم ءباسپاسوز قىزمەتىنىڭ حابارلاۋىنشا, ۆەدومستۆونىڭ ءبىلىم جانە عىلىم سالاسىنداعى ساپانى قامتاماسىز ەتۋ كوميتەتى ۋنيۆەرسيتەت جۇمىسىنان كوپتەگەن زاڭ بۇزۋشىلىقتى انىقتاعان. ۋنيۆەرسيتەتتە ءبىلىم بەرۋ ۇيىمدارى قىزمەتىنىڭ ۇلگىلىك ەرەجەلەرى, مەملەكەتتىك جالپىعا مىندەتتى ستاندارت تالاپتارى, سونداي-اق بىلىكتىلىك تالاپتارى ساقتالماعان.
«ۋنيۆەرسيتەتتى تەكسەرۋ بارىسىندا كوپتەگەن زاڭ بۇزۋشىلىق انىقتالدى. مىسالى, وقىتۋشىلاردىڭ ءبىر ۋاقىتتا ءار ءتۇرلى تىلدە وقىتاتىن ەكى ءتۇرلى توپتا ساباق وتكىزۋ فاكتىلەرى. بىراق مۇعالىمدەردىڭ وقۋ جۇكتەمەسىندە ءار توپ بويىنشا اۋديتوريالىق ساباقتار بولەك ەسەپتەلگەن. ودان بولەك, ۋنيۆەرسيتەتتە كەيبىر ساباقتار مۇلدەم وتكىزىلمەگەن. ءبىلىم بەرۋ باعدارلامالارىن ازىرلەۋ جانە بەكىتۋ كەزىندە زاڭ بۇزۋشىلىقتارعا جول بەرىلگەن. سونىمەن بىرگە اتىراۋ ينجەنەرلىك-گۋمانيتارلىق ينستيتۋتىنىڭ ستۋدەنتتەردى وقىتقان ءبىلىم بەرۋ باعدارلامالارى قر بعم تىزىلىمىنە ەنگىزىلگەن باعدارلامالارعا سايكەس كەلمەدى. ناتيجەسىندە ستۋدەنتتەر وقۋ پاندەرىن تولىق مەڭگەرمەگەن. سونداي-اق وقۋ پروتسەسى ساپالى پروفەسسورلىق-وقىتۋشىلىق كادرمەن قامتاماسىز ەتىلمەگەن», دەدى بعم ءبىلىم جانە عىلىم سالاسىنداعى ساپانى قامتاماسىز ەتۋ كوميتەتىنىڭ باسقارما باسشىسى ەلۆيرا ساپاربەكوۆا.
تەكسەرۋ اتىراۋ ينجەنەرلىك-گۋمانيتارلىق ينستيتۋتىندا ساپانى قامتاماسىز ەتۋدىڭ ىشكى جۇيەسى مەن قاجەتتى ماتەريالدىق-تەحنيكالىق بازانىڭ جوقتىعىن كورسەتتى. بىرقاتار ءبىلىم بەرۋ باعدارلاماسى بويىنشا وقۋ, ادىستەمەلىك جانە عىلىمي ادەبيەتتەر جوق, ياعني ستۋدەنتتەردىڭ ساپالى ءبىلىم الۋىنا جاعداي جاسالماعان. مۇنى تەست تاپسىرعان ستۋدەنتتەردىڭ ءبىلىم ناتيجەلەرى راستادى. ياعني ينستيتۋت ستۋدەنتتەرىنىڭ 90 پايىزى شەكتى بالدى جيناي المادى.
ايتا كەتەيىك, ۇلگىلىك قاعيدالاردىڭ نورمالارىنا سايكەس ستۋدەنتتەر ۋنيۆەرسيتەت ليتسەنزياسىنان ايىرىلعان ساتتەن باستاپ وقۋىن جالعاستىرۋ ءۇشىن باسقا جوو-عا اۋىسۋعا قۇقىلى.