اۋتيزم سپەكترى بۇزىلۋى ماسەلەلەرى بويىنشا ارنايى رەسپۋبليكالىق ۇيلەستىرۋ كەڭەسى قۇرىلادى. بۇل تۋرالى قر ءبىلىم جانە عىلىم ءمينيسترى اسحات ايماعامبەتوۆ تەلەگرام ءوزىنىڭ Telegram كانالىندا جازدى, دەپ حابارلايدى Egemen.kz.
«اۋتيزم سپەكترى بۇزىلۋى ماسەلەلەرى بويىنشا ارنايى رەسپۋبليكالىق ۇيلەستىرۋ كەڭەسى قۇرىلادى. ۇكىمەت مۇشەسى رەتىندە ونى ءوزىم باسقارۋدى ءجون كوردىم. سونداي-اق كەڭەس قۇرامىنا ۇەۇ وكىلدەرىن, سالالىق مەملەكەتتىك ورگانداردىڭ ۆيتسە-مينيسترلەرىن, اكىم ورىنباسارلارىن جانە باسقا دا ارىپتەستەرىمىزدى قوسامىز. ماڭىزدى ماسەلە - وسى باعىتتاعى بارلىق جۇمىستى ۇيلەستىرۋ.
اسب ماسەلەلەرى بويىنشا ارنايى جول كارتاسى بەكىتىلەدى. قۇجاتتا پروبلەمالىق ايماقتاردى انىقتاپ, قىسقا, ورتا جانە ۇزاق مەرزىمدى پەرسپەكتيۆاداعى مىندەتتەردى ايقىندايمىز. عىلىمي زەرتتەۋلەر جۇرگىزۋ ماڭىزدى. سول سەبەپتى بعم اۋتيزم سپەكترىنىڭ بۇزىلۋىن زەرتتەۋ جونىندەگى ارنايى عىلىمي باعدارلاماعا قارجى ءبولۋ بويىنشا جۇمىس جۇرگىزەدى», دەپ جازدى مينيستر.
ونىڭ ايتۋىنشا, بۇگىندە 19 جوعارى وقۋ ورنى ارنايى پەداگوگتەردى دايارلايدى. اتالعان ۋنيۆەرسيتەتتىڭ بارلىعىنا تۇزەتۋ كابينەتتەرى فورماتىندا رەسۋرستىق ورتالىقتار اشۋ تاپسىرىلدى.
ورتالىقتار ماماندار دايارلاۋ جونىندەگى كلينيكالىق بازا رەتىندە ارەكەت ەتەدى. بۇل باعىتتاعى جۇمىس قازاق ۇلتتىق قىزدار پەداگوگيكالىق ۋنيۆەرسيتەتىندە جولعا قويىلعان. ۋنيۆەرسيتەتتە «دارا» قورىنىڭ قولداۋىمەن رەسۋرستىق ورتالىق اشىلدى.
«بيىل ءبىز جوو-لارعا باعدارلامالاردى, ادىستەمەلەردى دايىنداۋ جانە ستۋدەنتتەردى وقىتۋ ءۇشىن ءاۋتيزمى بار بالالارمەن جۇمىس ىستەۋگە ماماندانعان شەتەلدىك پروفەسسورلاردى تارتۋ ءۇشىن قارجى بولدىك. وسى جىلى اباي اتىنداعى قازۇپۋ, قازاق ۇلتتىق قىزدار پەداگوگيكالىق ۋنيۆەرسيتەتى, قارمۋ وسى دەرتكە شالدىققان بالالارمەن جۇمىس ىستەپ جۇرگەندەر ءۇشىن ارالاس ونلاين/وفلاين فورماتىندا ارنايى ماگيسترلىك باعدارلامالار ازىرلەپ جاتىر. پپتك (پسيحولوگيالىق-پەداگوگيكالىق تۇزەتۋ كابينەتى), پمپك (پسيحولوگيالىق-مەديتسينالىق-پەداگوگيكالىق كەڭەس), رەسۋرستىق ورتالىقتار, ارنايى ينكليۋزيا كابينەتتەرىنىڭ قىزمەتكەرلەرىنە ماقساتتى گرانتتار ءبولۋدى باستادىق. سونداي-اق ولارعا بەيىندىك ماگيستراتۋراعا ءتۇسۋ ءۇشىن جاعداي جاساۋعا دايىنبىز», دەپ ءتۇسىندىردى ول.
ءمينيستردىڭ جازۋىنشا, ۇلگىلىك شتاتتارعا پەداگوگ-اسسيستەنتتەر ەنگىزىلدى. قازىردىڭ وزىندە مەكتەپتەردە 1 000-نان استام پەداگوگ-اسسيستەنت جۇمىس ىستەيدى. ولار ەرەكشە ءبىلىم بەرۋ قاجەتتىلىكتەرى بار بالالارعا مەكتەپكە بەيىمدەلۋگە جانە وقۋعا كومەكتەسەدى. بۇل باعىتتاعى جۇمىستار جالعاسادى.
«تۇزەتۋ كومەگىنە مەملەكەتتىك تاپسىرىستاردى ورنالاستىرۋدى باستايمىز. ياعني, وسى دەرتكە شالدىققان بالالارمەن ساپالى تۇزەتۋ جۇمىستارىن جۇرگىزۋگە دايىن ۇيىمدار بيۋدجەتتەن ءتيىستى قارجى الادى. بۇل بالالارىمىزدى وسىنداي ارنايى قولداۋمەن قامتۋدى كۇرت ارتتىرۋعا مۇمكىندىك بەرەدى. اتا-انالارعا, ماماندارعا بارلىق قاجەتتى اقپارات پەن ارنايى ۇيىمنىڭ دەرەكتەر بازاسى, سونداي-اق پپتك, پمپك جانە رەسۋرستىق ورتالىقتار تۋرالى اقپارات بارلىعىنا قولجەتىمدى بولۋى ءۇشىن بىرىڭعاي پورتال قۇرىلادى», دەلىنگەن مينيستر حابارلاماسىندا.