• RUB:
    6.68
  • USD:
    520.93
  • EUR:
    609.07
باستى سايتقا ءوتۋ
قازاقستان 31 ناۋرىز, 2022

قازاقستان مەن ەۋروپا وداعى ىنتىماقتاستىقتى نىعايتادى

520 رەت
كورسەتىلدى

قر پرەزيدەنتى اكىمشىلىگىنىڭ ءبىرىنشى ورىنباسارى تيمۋر سۇلەيمەنوۆ پەن پرەزيدەنت اكىمشىلىگى باسشىسىنىڭ ورىنباسارى – پرەزيدەنتتىڭ حالىقارالىق ىنتىماقتاستىق جونىندەگى ارناۋلى وكىلى ەرجان قازىحان وسى اپتانىڭ باسىندا بريۋسسەلگە جۇمىس ساپارىمەن باردى, دەپ حابارلايدى Egemen.kz.

ەۋروپا وداعىنىڭ جوعارى لاۋازىمدى وكىلدەرمەن وتكەن كەلىسسوزدەر بارىسىندا قازاقستان مەن ەۋرووداق اراسىنداعى ساۋدا, ەنەرگەتيكا, كولىك, قارجى جانە اۋىل شارۋاشىلىعى سالالارىنداعى ىنتىماقتاستىقتى كەڭەيتۋ ماسەلەلەرى قاراستىرىلدى.

ساپار بارىسىندا ساۋدا ماسەلەلەرى جونىندەگى ەۋروپالىق كوميسسيانىڭ ۆيتسە-پرەزيدەنتى ۆالديس دومبروۆسكيسپەن, كولىك جونىندەگى ەۋروكوميسسار ادينا ۆالەانمەن, اۋىل شارۋاشىلىعى جونىندەگى ەۋروكوميسسار يانۋش ۆويتسەحوۆسكيمەن, سونداي-اق ەنەرگەتيكا جانە قارجىلىق تۇراقتىلىق جونىندەگى «FISMA» ديرەكتوراتتاردىڭ باسشىلىعىمەن رەسمي كەزدەسۋلەر وتكىزىلدى. سونىمەن قاتار ەۋروپالىق كەڭەس پەن ەۋروپالىق سىرتقى ءىس-قيمىل قىزمەتىنىڭ باسشىلىعىمەن كەلىسسوزدەر جۇرگىزىلدى.

تاراپتار قازاقستان پرەزيدەنتى قاسىم-جومارت توقاەۆتىڭ 2021 جىلعى قاراشاداعى بريۋسسەلگە ساپارى ەكىجاقتى جانە كوپجاقتى ىقپالداستىقتىڭ بارلىق باعىتى بويىنشا قازاقستان-ەۋروپا ىنتىماقتاستىعىن جانداندىرۋعا تىڭ سەرپىن بەردى دەگەن پىكىرگە كەلدى. وسى رەتتە ەۋروپالىق كەڭەستىڭ باسشىلىعىنا ەكىنشى مەرزىمگە قايتا سايلانۋىنا بايلانىستى ەۋروپالىق كەڭەس پرەزيدەنتى شارل ميشەلگە مەملەكەت باسشىسىنىڭ جەكە جولداۋ حاتى تابىس ەتىلدى.

قازاقستاندىق تاراپ قازىرگى حالىقارالىق جاعدايعا ءمان بەرە وتىرىپ, كەڭەيتىلگەن سەرىكتەستىك پەن ىنتىماقتاستىق تۋرالى كەلىسىمدى جۇزەگە اسىرۋ اياسىندا قازاقستان مەن ەۋروپا وداعى اراسىنداعى ءوزارا ءىس-قيمىلدى كەڭەيتۋ جانە ودان ءارى نىعايتۋ جونىندەگى ناقتى شارالارعا ارنايى توقتالدى. اتاپ ايتقاندا, سانكتسيالاردىڭ قازاقستان ەكونوميكاسىنا جاناما كەرى اسەرىن بارىنشا ازايتۋ جانە بولدىرماۋ قاجەتتىگىنە ەۋروپالىق سەرىكتەستەردىڭ نازارىن اۋداردى. ەۋروپالىق تاراپ قازاقستاننىڭ الاڭداۋشىلىعىنا تولىق تۇسىنىستىك تانىتىپ, بۇل ماسەلە بويىنشا بارىنشا قولداۋ كورسەتۋگە دايىن ەكەنىن مالىمدەدى.

سونىمەن قاتار ەۋروپالىق تاراپ قازاقستان پرەزيدەنتى جاريالاعان ساياسي جانە ەكونوميكالىق رەفورمالارعا ايتارلىقتاي قىزىعۋشىلىق تانىتتى. وسىعان بايلانىستى ەۋروپا وداعىنىڭ وكىلدەرى قاسىم-جومارت توقاەۆتىڭ جاقىندا قازاقستان حالقىنا ارناعان جولداۋىنىڭ نەگىزگى تەزيستەرىمەن ەگجەي-تەگجەيلى تانىسىپ, مەملەكەت باسشىسىنىڭ باستامالارىن وڭ باعالاپ, ەۋروپا وداعىنىڭ ءتۇرلى قۇرالدارى ارقىلى تۇراقتى دامۋ, قۇقىق ۇستەمدىگى باعىتىندا ولاردى ىسكە اسىرۋعا قولداۋ كورسەتۋگە دايىن ەكەندىگىن مالىمدەدى. بۇدان بولەك جولداۋدا ايتىلعان ساياسي رەفورمالاردىڭ ءىس جۇزىندە ورىندالۋى ەلىمىزدى ودان ءارى ساياسي جاڭعىرتۋعا جانە قازاقستان مەن ەۋروپالىق وداق اراسىنداعى ىنتىماقتاستىقتى نىعايتۋعا ىقپال ەتەتىنى اتاپ ءوتىلدى.

سوڭعى جاڭالىقتار