استانادا 24 اقپان مەن 24 ناۋرىز ارالىعىندا «تۋبەركۋلەزبەن كۇرەسكە ينۆەستيتسيا سالىڭىز. ءومىردى قۇتقار» اتتى ايلىق ءوتتى. ايلىق اياسىندا قالا تۇرعىندارى اۋرۋدان ساقتانۋ, ۋاقتىلى تەكسەرۋلەردەن ءوتۋدىڭ ماڭىزى تۋرالى جان-جاقتى مالىمەتكە قانىقتى.
كەيىنگى 5 جىلدا نۇر-سۇلتان قالاسىندا تۋبەركۋلەزبەن اۋىرۋ 30,1%-عا تومەندەدى. بۇل كورسەتكىشتىڭ جاقسارۋىنا اۋرۋدىڭ الدىن الۋ شارالارى اسەر ەتىپ جاتىر. قالالىق قوعامدىق دەنساۋلىق ساقتاۋ باسقارماسى باسشىسىنىڭ ورىنباسارى ءاليا رۇستەموۆانىڭ ايتۋىنشا, قازىر تۇرعىندارعا پروفيلاكتيكالىق فليۋوروگرافييالىق تەكسەرۋ جۇرگىزۋ ءۇشىن مەديتسينالىق-سانيتارلىق العاشقى كومەك (مساك) ۇيىمدارىندا 16 ستاتسيونارلىق جانە 5 جىلجىمالى فليۋوروگرافيالىق اپپارات جۇمىس ىستەيدى. 2022 جىلى تاعى دا وسىنداي 3 اپپارات ساتىپ الۋ جوسپارلانىپ وتىر.
«تۋبەركۋلەزدى دياگنوستيكالاۋدى گەندىك-مولەكۋلالىق ادىستەردىڭ كومەگىمەن تەكسەرۋ ءۇشىن نۇر-سۇلتان قالاسىندا 4 اپپارات بار: ۇشەۋى – مساك ۇيىمىندا (4, 5, 7-ەمحانا) جانە بىرەۋى – قالالىق فتيزيوپۋلمونولوگيا ورتالىعىندا. اتالعان زەرتتەۋ 2-3 ساعات ىشىندە قوزدىرعىشتىڭ بار-جوعىن انىقتاپ قانا قويماي, دارىلىك سەزىمتالدىقتىڭ بار-جوعىن انىقتاۋعا, ياعني ەمدەۋدىڭ ءتيىمدى سحەماسىن تاعايىنداۋعا مۇمكىندىك بەرەدى», دەدى ءا.رۇستەموۆا.
ەلوردادا تۋبەركۋلەزدەن ەمدەلىپ جاتقان ناۋقاستارعا ۇنەمى الەۋمەتتىك قولداۋ كورسەتىلەدى. بۇرىن ازىق-ت ۇلىك سەبەتتەرى مەن جول ءجۇرۋ كارتالارى بەرىلەتىن, ال 2019 جىلدان باستاپ 10 اەك مولشەرىندە اي سايىنعى اقشالاي تولەم تۇرىندە كومەك كورسەتىلەدى.
«قاۋپى جوعارى» توپتاردا تۋبەركۋلەزدى انىقتاۋ بويىنشا ارىپتەس رەتىندە ۇكىمەتتىك ەمەس ۇيىمداردى تارتۋ ماڭىزدى. بۇل ۆەدومستۆوارالىق جانە سەكتورارالىق ءوزارا ءىس-قيمىلدى كۇشەيتۋگە مۇمكىندىك بەرەدى. 2022 جىلدان باستاپ ەلوردالىق ءماسليحات الەۋمەتتىك تاپسىرىس اياسىندا تۋبەركۋلەزدىڭ الدىن الۋ بويىنشا جۇمىسقا ۇەۇ تارتۋدى قولدادى.
جاقىندا وتكەن «تۋبەركۋلەزبەن كۇرەسكە ينۆەستيتسيا سالىڭىز. ءومىردى قۇتقار» اتتى ايلىقتى قوعامدىق دەنساۋلىق ساقتاۋ باسقارماسى ۆەدومستۆوارالىق ءوزارا ءىس-قيمىل اياسىندا قالا اكىمدىگىنىڭ قولداۋىمەن وزىنە قاراستى ۇيىمدارمەن, بارلىق سەرىكتەسىمەن بىرلەسىپ ۇيىمداستىردى. بۇل ايلىق تۇرعىنداردىڭ پروفيلاكتيكالىق تەكسەرۋلەردەن ۋاقتىلى ءوتۋدىڭ ماڭىزى جونىندە حاباردار بولۋىنا, ءاربىر ازاماتتىڭ دەنساۋلىعىن ساقتاۋ جانە نىعايتۋ ءۇشىن جاۋاپكەرشىلىگىن ارتتىرۋعا مۇمكىندىك بەرەدى.
«سانيتارلىق-ەپيدەميولوگيالىق باقىلاۋ دەپارتامەنتى جىل سايىن قالالىق دەنساۋلىق ساقتاۋ باسقارماسىمەن, قالالىق فتيزيوپۋلمونولوگيا ورتالىعىمەن, ءبىلىم باسقارماسىمەن جانە اۋداندىق اكىمدىكتەرمەن بىرلەسىپ ءىس-شارالار, اكتسيالار وتكىزەدى. دەپارتامەنتتىڭ الەۋمەتتىك پاراقشالارىندا تۋبەركۋلەزدىڭ الدىن الۋ بويىنشا ماقالالار, جادىنامالار جاريالانادى. مەديتسينالىق ۇيىمداردا سەمينار-ترەنينگتەر وتكىزىلەدى. ايلىق اياسىندا قالا مەكتەپتەرىندە, جوعارى جانە ورتا وقۋ ورىندارىندا قازاق جانە ورىس تىلدەرىندە اشىق ساباقتار, تۋبەركۋلەزدىڭ الدىن الۋ تاقىرىبىندا سىنىپ ساعاتتارى وتكىزىلۋدە. ويىن-ساۋىق ورتالىقتارىندا حابارلاما ارقىلى دارىستەر وتكىزىلەدى», دەدى قالالىق سانيتارلىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى جاننا پىراليەۆا.
ول دۇرىس تاماقتانباۋ اعزانى السىرەتەتىنىن اتاپ ءوتتى. ىشىمدىككە جانە ەسىرتكىگە تاۋەلدى, سونداي-اق تۋبەركۋلەزبەن اۋىراتىن ادامدارمەن تىعىز بايلانىستا بولعاندار اۋرۋ جۇقتىرۋ قاۋپىنە جاقىن بولادى. دەنەنىڭ السىرەۋىنەن بولاتىن وتكىر جانە سوزىلمالى اۋرۋلار اعزانىڭ كۇرەسۋىن تومەندەتەدى. بۇل تۋبەركۋلەزدىڭ پايدا بولۋىنا نەمەسە ورشۋىنە جانە ونىڭ اۋىر اعىمىنا اكەلۋى مۇمكىن.
«ەرەسەكتەر مەن جاسوسپىرىمدەر ءۇشىن ەرتە دياگنوز قويۋ جولى – فليۋوروگرافيالىق تەكسەرۋ. تۋبەركۋلەزدىڭ الدىن الۋ جۇيەسىندەگى فليۋوروگرافيا اۋرۋدىڭ ەرتە كەزەڭىندە جىلدام ەمدەلىپ, ساۋىعىپ شىعۋىنا مۇمكىندىك بەرەدى. سونداي-اق بالالار اراسىندا تۋبەركۋلەزدىڭ الدىن الۋدىڭ ءتيىمدى جولى – بتسج ەكپەسى مەن 6-7 جاستاعى رەۆاكتسينالاۋ. سوندىقتان اتا-انالاردى بالاسىنا تۋبەركۋلەزگە قارسى ەكپەنى ۋاقتىلى قابىلداۋعا شاقىرامىن. سەبەبى ءار بالانىڭ دەنساۋلىعى ءوز قولىمىزدا», دەدى ج.پىراليەۆا.