قاشان دا بولاشاققا ۇمىتپەن قارايتىن دانا حالقىمىز پرەزيدەنتتىڭ جولداۋىن جىلى قابىلدادى. قاسىم-جومارت توقاەۆ سوڭعى ۋاقىتتا ەلىمىزدە ورىن العان ەڭ وزەكتى ماسەلەلەرگە تالداۋ ارقىلى وزگەرىستەر جاساۋدىڭ كەزەڭى كەلگەندىگىن العا تارتا وتىرىپ, قازاقستان حالقىنا ساياسي جاڭعىرتۋدىڭ كەشەندى باعدارلاماسىن ۇسىندى.
ەلىمىزدەگى ساياسي رەفورمانىڭ وزەكتىلىگىن عالامدا جانە ەلىمىزدە ورىن العان سوڭعى ۋاقيعالارمەن ساباقتاستىرا كەلە «ساياسي جاڭعىرۋ بولماسا, ەلىمىزدى ورنىقتى دامىتۋ, اۋقىمدى الەۋمەتتىك-ەكونوميكالىق وزگەرىس جاساۋ مۇمكىن ەمەس» ەكەندىگىن قاداپ ايتتى. ق.توقاەۆتىڭ جولداۋدا ۇسىنعان 10 باستاما ۇزاق جىلدار بويى قوردالانعان ەلدەگى ساياسي, اكىمشىلىك جانە الەۋمەتتىك ماسەلەلەردى شەشۋدىڭ كىلتى بولماق. مىسالى, ەلدى كۇشتى پارلامەنتى بار پرەزيدەنتتىك رەسپۋبليكاعا اينالدىرۋ, ءادىل سايلاۋ جۇيەسىن قۇرۋ, ساياسي پارتيالاردىڭ جۇمىسىن جاقسارتۋ, كونستيتۋتسيالىق سوت قۇرۋ, ۇلتتىق قۇرىلتاي قۇرۋ, اكىمشىلىك-اۋماقتىق قۇرىلىمدى جاقسارتۋ, داعدارىسقا قارسى شارالاردى جۇرگىزۋ سياقتى اۋقىمدى جوسپارلارى ەلدىڭ كوڭىلىن كۇپتى ەتكەن جانە كوكەيىندە جۇرگەن كوپتەگەن ماسەلەنىڭ وڭدى شەشىلۋىنە سەپتىگىن تيگىزەرى انىق. پرەزيدەنتىمىز كوتەرگەن باستامالار حالىق پەن بيلىكتى ءبىر ارناعا توعىستىراتىن جانە ەلدى جارقىن بولاشاققا, ياعني جاڭا قازاقستانعا الىپ باراتىن باسپالداق ىسپەتتەس.
اسىرەسە, پرەزيدەنتتىڭ «ازاماتتىق قوعام ينستيتۋتتارىنىڭ ءرولىن نىعايتۋ» باستاماسى قوعامداعى شيەلەنىسكەن ماسەلەلەردى شەشۋدىڭ ۇتىمدى ءتاسىلى ەكەندىگىنە كۇمان جوق. بۇل باستاما – ۇلت يگىلىگى ءۇشىن قىزمەت ەتەتىن كوپتەگەن قوعامدىق ۇيىم مەن كەڭەستىڭ قۇرىلۋىنا سەپتىگىن تيگىزىپ, ۇكىمەت پەن قوعام اراسىن جالعاۋشى التىن كوپىرگە اينالادى دەپ ويلايمىن. ويتكەنى قوعامدىق ۇيىمدار مەن كەڭەستەردىڭ بەلسەندى جۇمىس ىستەۋى ازاماتتىق قوعامنىڭ جانە قوعامدىق ينستيتۋتتاردىڭ دامۋىنا سەرپىن بەرەدى.
اباي اتىنداعى قازۇپۋ-ءدىڭ جاس زەرتتەۋشىلەر كەڭەسى پرەزيدەنتتىڭ جولداۋدا كوتەرگەن باستامالارىن جاستار اراسىندا ناسيحاتتاۋ جانە جاستاردىڭ ساۋاتتىلىعىن كوتەرۋ ماقساتىندا «جاڭا كەزەڭدەگى جاڭا قازاقستان جاستارى» اتتى جاستاردىڭ ساۋاتتىلىق اپتالىعىن وتكىزۋدى جوسپارلاپ وتىر. اپتالىق اياسىندا جاستارىمىزدىڭ ءدىني, ساياسي, قۇقىقتىق, مەديا جانە اقپاراتتىق, قارجىلىق جانە گيگيەنالىق ساۋاتتىلىقتارىن كوتەرۋ ماقساتىندا وسى سالالاردىڭ عالىمدارىمەن, جاۋاپتى ورگان وكىلدەرىمەن جانە ساراپشىلارمەن كەزدەسۋلەر وتكىزەتىن بولامىز.
بابالارىمىزدىڭ «بىرلىك بار جەردە – تىرلىك بار», «جۇمىلا كوتەرگەن جۇك جەڭىل» دەگەن ناقىل سوزدەرىنىڭ استارىندا تەرەڭ ءمان جاتىر ەمەس پە؟! مەملەكەت باسشىسى ۇسىنعان 10 باستامانى ەل بولىپ جۇمىلىپ جۇزەگە اسىرعاندا عانا جاڭا قازاقستاندى قۇراتىنىمىزدى بارشامىز ءتۇسىنۋىمىز كەرەك.
شاحيسلام لايسحانوۆ,
اباي اتىنداعى قازۇپۋ,
جاس زەرتتەۋشىلەر كەڭەسىنىڭ توراعاسى, PhD