بۇل تۋرالى بۇگىن ۇكىمەت وتىرىسىندا قر ۇلتتىق ەكونوميكا ءمينيسترى الىبەك قۋانتىروۆ ايتتى, دەپ حابارلايدى Egemen.kz.
ونىڭ ايتۋىنشا, مەملەكەت باسشىسىنىڭ جولداۋىن ىسكە اسىرۋ جونىندەگى جالپىۇلتتىق ءىس-شارالار جوسپارىنىڭ «قۇقىق قورعاۋ ينستيتۋتتارىن كۇشەيتۋ» باعىتىندا 9 ءىس-شارانى ىسكە اسىرۋ كوزدەلگەن.
«ازاماتتاردىڭ ىرگەلى قۇقىقتارىن قورعاۋ ماقساتىندا قازاقستان رەسپۋبليكاسىنىڭ كونستيتۋتسيالىق سوتى قۇرىلاتىن بولادى. كونستيتۋتسيادا ادام قۇقىقتارى جونىندەگى ۋاكىلدىڭ مارتەبەسى مەن قىزمەتىنىڭ كەپىلدىكتەرى رەگلامەنتتەلەدى. سونداي-اق ادام قۇقىقتارى جونىندەگى ۋاكىلگە كونستيتۋتسيالىق سوتقا جۇگىنۋ قۇقىعى بەرىلەدى. سونىمەن قاتار ءولىم جازاسى كونستيتۋتسيادان الىپ تاستالادى», دەدى الىبەك قۋانتىروۆ.
ءمينيستردىڭ ايتۋىنشا, پروكۋراتۋرا ورگاندارىنا ازاپتاۋ تۋرالى ىستەردىڭ ايرىقشا تەرگەلۋىن بەلگىلەۋ كوزدەلەدى.
«سونداي-اق «پروكۋراتۋرا تۋرالى» كونستيتۋتسيالىق زاڭ جوباسىن ازىرلەۋ جوسپارلانۋدا. جوعارعى سوت كەڭەسىنىڭ كونكۋرستىق راسىمدەرىن ونلاين-ترانسلياتسيالاۋدى جانە ولاردىڭ قورىتىندىلارى بويىنشا ەگجەي-تەگجەيلى, دالەلدى تۇسىندىرمەلەر جاريالاۋ ەنگىزىلەدى», دەدى ول.