قارۋلى كۇشتەردىڭ ينجەنەرلىك-ساپەرلىك بولىمشەلەرى بيىلعى 28 ناۋرىزدان باستاپ ارىستاعى جانە جامبىل وبلىسىنىڭ بايزاق اۋدانىنداعى وق-ءدارى قويمالارىندا ورىن العان وقيعالاردىڭ سالدارىن جويۋ جۇمىستارىنا كىرىسەدى, دەپ حابارلايدى Egemen.kz قورعانىس مينيسترلىگىنە سىلتەمە جاساپ.
اتالعان شارالار «قاۋىپسىز ەل» ۇلتتىق جوباسىن جانە مەملەكەت باسشىسى قاسىم-جومارت توقاەۆتىڭ وق-دارىلەردى قاۋىپسىز ساقتاۋدى قامتاماسىز ەتۋ جونىندەگى تاپسىرمالارىن ىسكە اسىرۋ شەڭبەرىندە جۇرگىزىلەدى.
ارىس قالاسىندا جارۋ جولىمەن جويىلاتىن وق-ءدارى قالدىقتارى قويمالاردىڭ تەحنيكالىق اۋماعىنان ارنايى جابدىقتالعان پوليگونعا جەتكىزىلەدى.
جامبىل وبلىسىنداعى ينجەنەرلىك وق-ءدارى قويماسىنىڭ اۋماعىندا وق-ءدارى قالدىقتارىن جويۋعا ارنالعان ورىن جابدىقتالعان. ال قالعان بولىگى ارنايى پوليگوندارعا شىعارىلىپ, جويىلادى.
جالپى وسى جۇمىستارعا 650-دەن استام اسكەري مامان تارتىلادى. جەرگىلىكتى حالىقتىڭ قاۋىپسىزدىگىن قامتاماسىز ەتۋگە ەرەكشە نازار اۋدارىلىپ وتىر.
ارىستاعى جانە جامبىل وبلىسىنىڭ بايزاق اۋدانىنداعى وق-ءدارى قويمالارىندا ورىن العان وقيعالاردىڭ سالدارىن جويۋ جۇمىستارى بيىلعى قاراشا ايىنىڭ سوڭىنا دەيىن جالعاسادى.