بۇگىن جەر-جەردە دۇنيەجۇزىلىك «جەر ساعاتى» اكتسياسى ءوتىپ جاتىر. قازاقستان اتالعان ەكولوگيالىق اكتسياعا 2009 جىلدان باستاپ قاتىسىپ كەلەدى, دەپ حابارلايدى Egemen.kz.
«جەر ساعاتى» - دۇنيەجۇزىلىك جابايى تابيعات قورىنىڭ (WWF) باستاماسىمەن 2007 جىلدان بەرى بۇكىل الەمدە وتكىزىلىپ كەلە جاتقان ەڭ اۋقىمدى حالىقارالىق ەكولوگيالىق شارا.
اتالعان شاراعا 180 ەل, 7 مىڭ قالا قاتىسادى. جىل سايىنعى ءداستۇر بويىنشا ناۋرىز ايىنىڭ سوڭعى سەنبىسىندە ەل تۇرعىندارى ساعات 20:30-دان 21:30-عا دەيىن ءۇيى مەن پاتەرىندەگى شامدار مەن تۇرمىستىق ەلەكتر قۇرالدارىن وشىرەدى.
بۇل اكتسياعا مەملەكەتتىك جانە جەكە تۇلعالار دا قولداۋ كورسەتەدى. بيىل قازاقستاندا وتەتىن «جەر ساعاتى» اكتسياسى ەكوتۋريزم تاقىرىبىنا ارنالىپ وتىر.
ەكوتۋريست بولۋ ءۇشىن تابيعاتتى ساقتاۋعا جانە جەرگىلىكتى حالىقتىڭ ەكونوميكالىق دامۋىنا ۇلەس قوسۋ كەرەك.
سونداي-اق, اكتسيا بارىسىندا نۇر-سۇلتان قالاسى بويىنشا «اقوردا» رەزيدەنتسياسى, بايتەرەك, تريۋمفالدى اركا, «استانا وپەرا», نازارباەۆ ۋنيۆەرسيتەتىندە جانە قالانىڭ باسقا دا ءىرى نىساندارىندا بۇكىل ەلەكتر ەنەرگياسى وشىرىلەدى. ال, الماتى قالاسىندا «قازاقستان» قوناق ءۇيىنىڭ عيماراتىندا, قبتۋ جانە تاعى باسقا ءىرى نىسانداردا جارىق ۋاقىتشا سوندىرىلەدى.
ايتا كەتسەك, دۇنيەجۇزى بويىنشا وتەتىن ەكولوگيالىق اكتسياعا كەز كەلگەن ادام قاتىسىپ, ۇلەسىن قوسا الادى. ول ءۇشىن جەرگىلىكتى ۋاقىت بويىنشا كەشكى ساعات 20:30-دا 1 ساعاتقا عيماراتتىڭ (تۇرعىن ءۇي, مەكەمە تاعى سول سياقتى) جارىعىن ءسوندىرۋ كەرەك.