«قازاۆتوجول» ۇك» اق-دا قۇرىلىس ماۋسىمىنا اۋقىمدى دايىندىق جۇمىستارى باستالدى. ماسەلەن, رەسپۋبليكالىق ماڭىزى بار الماتى – كوسموستانتسيا تراسساسىنىڭ 8-34 شاقىرىمى ارالىعى ۋچاسكەسى («الما-اراسان» شيپاجايىنا كىرەبەرىس) كۇردەلى جوندەۋدەن وتەدى. كەشە قوعامدىق تىڭداۋ ءوتتى. بەلسەندىلەر داۋىس بەرىپ, ۇلكەن الماتى كولىنە اپارار جولدى كۇردەلى جوندەۋگە قارسى ەمەس ەكەندىكتەرىن جەتكىزدى, دەپ حابارلايدى Egemen.kz اتالعان كومپانيانىڭ ءباسپاسوز قىزمەتىنە سىلتەمە جاساپ.
بۇگىندە جوبالاۋ-سمەتالىق قۇجاتتاما دايىن, ەكولوگيالىق ساراپتاما ساتىسىندا تۇر. ساراپتامانىڭ وڭ قورىتىندىسىن العاننان كەيىن كونكۋرس جاريالانىپ, زاڭناماعا سايكەس مەردىگەر انىقتالادى. سودان كەيىن ۋچاسكەدە قۇرىلىس-مونتاج جۇمىستارى جۇرگىزىلەدى. ايتا كەتۋ كەرەك, جول ەكى جولاقتى بولىپ قالا بەرمەك. سونىمەن قاتار, جوبادا 1-گە 10 وتەمدىك اعاش وتىرعىزۋ قاراستىرىلعان.
كۇردەلى جوندەۋ جۇمىستارى اياسىندا اۋماقتا باقىلاۋ الاڭدارى, اۆتوكولىكتەرگە ارنالعان تۇراقتار جانە تاس قۇلاماسىنان قورعايتىن تورلار سالىنباق.
جول ينفراقۇرىلىمىن قايتا قۇرۋ جۇمىستارى ءتۋريزمدى ودان ءارى دامىتۋعا وڭ اسەر ەتەدى جانە قوناقتار مەن جەرگىلىكتى تۇرعىندار ءۇشىن قولايلى جاعداي جاسايدى. ال توتەنشە جاعدايلار كەزىندە ارنايى تەحنيكا جەرگىلىكتى جەرگە ودان دا جىلدام جەتەدى.
بۇل جوبانى 24 ايدا جۇزەگە اسىرۋ جوسپارلانىپ وتىر.
ەستەرىڭىزگە سالا كەتەيىك, الماتى - كوسموستانتسيا رەسپۋبليكالىق ماڭىزى بار جول III ساناتقا جاتادى, جابىنى - اسفالت-بەتون. ونىڭ ۇزىندىعى 26 شاقىرىم.