Adal پارتياسىنىڭ ساياسي كەڭەسى Amanat پارتياسىنا قوسىلۋ تۋرالى شەشىم قابىلدادى, دەپ حابارلايدى Egemen.kz
«قازىر بۇكىل الەم جاھاندىق ەكونوميكالىق جانە گەوساياسي داعدارىستى باستان كەشىرىپ جاتىر. اۋمالى-توكپەلى كەزەڭ بارىمىزدەن جىلدام بەيىمدەلۋدى قاجەت ەتەدى. ۋكراينا-رەسەي قاقتىعىسى مەن ودان كەيىنگى گەوساياسي تەكەتىرەس, ەۋروپا تەرريتورياسىنداعى گۋمانيتارلىق كاتاكليزمدەر قازىردىڭ وزىندە دوللاردىڭ وسۋىنە, لوگيستيكالىق دالىزدەردى قايتا قۇرىلىمداۋعا, ەنەرگيا تاسىمالداۋشىلاردىڭ ءرولىن قايتا قاراۋعا الىپ كەلدى. رەسەيگە قولدانىلعان قاتاڭ سانكتسيالار ءبىزدىڭ ەلگە دە تىكەلەي اسەر ەتىپ جاتىر. وكىنىشكە قاراي, قاقتىعىستىڭ سالدارى حالىقتىڭ تابىسىنىڭ تومەندەۋىنە اكەلىپ سوعادى», دەدى Adal پارتياسىنىڭ حاتشىسى ەلدار جۇماعازيەۆ.
ونىڭ اتاپ وتۋىنشە, سىرتقى ساياساتتاعى وسىنداي قاۋىپ-قاتەردىڭ كەزىندە, كەي ماسەلەلەرگە قاتىستى پىكىر قايشىلىعىن قويىپ, ء«بىر جاعادان باس, ءبىر جەڭنەن قول شىعارىپ», بىرگە قادام جاسايتىن كەزەڭ تۋدى. ءدال قازىر, تىرلىكتىڭ كۇشى دە, بەرەكە كوزى دە — بىرلىكتە.
«Adal پارتياسىنىڭ بۇگىنگى كۇنگە دەيىنگى تىڭ يدەيالارى مەن زاماناۋي تەحنولوگيالىق كوزقاراستارى پرەزيدەنتىمىزگە سالماقتى قولداۋ بولا الادى دەپ ەسەپتەيمىز. كەز كەلگەن وزگەرىستە سابىرلى قالپىمەن سالماقتى شەشىم قابىلدايتىن قاسىم-جومارت توقاەۆتىڭ جۇمىس ءستيلى بىزگە ۇنايدى. ول قازىر ادىلەتتى مەملەكەت قۇرۋدى كوزدەپ وتىر. مەملەكەت باسشىسىنىڭ بۇگىنگى قازاقستان حالقىنا جولداۋى اياسىندا ايتقان ساياسي رەفورمالارى سونىڭ تاعى ءبىر دالەلى. بىراق بۇل ايتىلعان رەفورمالار قالاي جۇزەگە اسىرىلادى؟ ماسەلە وسىندا. ول ءۇشىن بۇكىل قازاق قوعامى بىرىگۋى قاجەت. پرەزيدەنت رەفورمالارىنىڭ جەرگىلىكتى جەردە ءتيىستى دەڭگەيدە ىسكە اسىرىلماي قالۋ قاۋپى جوعارى. قاسىم-جومارت كەمەل ۇلى ايتقان «دوستارعا – ءبارىن, قالعانىنا زاڭ بويىنشا» دەگەن قاعيدامەن كەلگەن قوعامنىڭ وتكەنىن ۇمىتپاۋىمىز كەرەك. سول ءۇشىن, ءبىز, ادالدىقتار جاڭا قازاقستاندى قۇرۋعا بەلسەندى قاتىسىپ, ەلىمىزدەگى وڭ وزگەرىسكە ۇلەس قوسقىمىز كەلەدى. پارتيالاستارىمىزبەن اقىلداسا كەلە, بۇگىن Adal-دىڭ ساياسي كەڭەسىندە پرەزيدەنتتىك Amanat پارتياسىنا قوسىلۋ تۋرالى ءبىراۋىزدان شەشىم قابىلدادىق. پارتيا جاناشىرلارىنا ايتارىمىز, وسى ۋاقىتقا دەيىن حالىقتىڭ تابىسىن ارتتىرۋ, ءار اۋىلدىڭ ماماندانۋ كارتاسىن ازىرلەۋ, اكىمدەردى ادىستەمەلىك قولداۋ جانە باسقا دا پارتيا مۇشەلەرىنىڭ الدىندا العان مىندەتتەمەلەرىمىزدى تولىق ورىندايمىز. وعان كۇمان بولماسىن. بيلىك پارتياسىمەن بىرىككەننەن كەيىن باستامالارىمىز تىڭ سەرپىن الىپ, حالىق يگىلىگىن كورەدى دەپ سەنەمىز. ءبىزدىڭ شەشىمىمىزگە وزگە دە ارىپتەستەرىمىز بەن پارتيالاستارىمىز, پارتيا جاناشىرلارى قولداۋ بىلدىرەدى دەپ ۇمىتتەنەمىز! «Amanat»-پەن بىرگە الار اسۋىمىز الدا!», دەدى ول.