«قازاقستان رەسپۋبليكاسىنىڭ ساۋلەتشىلەر وداعى» قوعامدىق بىرلەستىگى الماتى قالاسىندا وتكەن XVII سەزىنىڭ قورىتىندىسىن جاريالادى, دەپ حابارلايدى Egemen.kz.
جيىن بارىسىندا ەلىمىزدەگى ساۋلەت يندۋسترياسىن دامىتۋدىڭ باستى ماسەلەلەرى تالقىلانعان.
ءىس-شاراعا ساۋلەتشىلەر وداعىنىڭ فيليالدارى مەن باستاۋىش ۇيىمدارىنان 90 دەلەگات قاتىستى.
سەزد كەزىندە بىرلەستىكتىڭ جاڭا باسقارۋشى قۇرامى سايلانعان. وداقتىڭ باسشىسى لاۋازىمىنا پروفەسسور, حالىقارالىق ساۋلەت اكادەمياسىنىڭ كوررەسپوندەنت مۇشەسى, قازاقستاننىڭ قۇرمەتتى قۇرىلىسشىسى, كسرو جانە قازاقستان ساۋلەتشىلەر وداعىنىڭ مۇشەسى سەرىك سۇلتانعالي تاعايىندالدى.
وداقتىڭ جاڭا ۆيتسە-پرەزيدەنتتەرى بولىپ قۇرمەتتى قۇرىلىسشىلار ايدار تاتىعۇلوۆ پەن عابيت سادىرباەۆ سايلاندى.سونىمەن قاتار, تەكسەرۋ كوميسسياسىنىڭ قۇرامىنا ۆلاديمير سيدوروۆ, ەرجان احمەتوۆ, قالبي قوشقارباەۆ, تولەتاي جارىلعانوۆ كىردى.
باسقوسۋدا قازاقستان ارحيتەكتۋراسىنىڭ قازىرگى زامانعى كەزەڭى مەن بولاشاق دامۋىنىڭ وزەكتى ماسەلەلەرىن قوزعاعان بىرنەشە بايانداما تىڭدالدى.
«بۇرىن ءبىزدىڭ ەلىمىزدە قالا قۇرىلىسى كەڭەسى جۇمىس ىستەگەن. كەز كەلگەن عيماراتتىڭ قۇرىلىسىن كولەمىنە قاراماستان, قازاقستان ساۋلەتشىلەر وداعى جانىنداعى ساۋلەت قوعامداستىعى ارقاشان قاراستىراتىن. وداقتىڭ جاس مۇشەلەرى كوپ ەكەنىن ەسكەرە وتىرىپ, بارلىق جاڭا تەحنولوگيالار وداقتىڭ باقىلاۋىندا ەكەنىن ايتقىم كەلەدى. ازاماتتار نارازى بولاتىن حاوتيكالىق جانە تىعىز قۇرىلىسقا جول بەرىلمەۋى كەرەك. ءبىز قالا قۇرىلىسى كەڭەسىنىڭ شەشىمدەرى مەن ۇسىنىستارىنا قول جەتكىزەمىز جانە وعان سۇيەنەمىز», دەدى ساۋلەتشىلەر وداعىنىڭ پرەزيدەنتى سەرىك سۇلتانعالي.
ايتا كەتسەك, قازاقستان ساۋلەتشىلەر وداعى 1936 جىلدان بەرى ۇزاق جانە جەمىستى دامۋ جولىنان ءوتتى. 1992 جىلى بۇرىنعى كسرو ساۋلەتشىلەر وداعىنىڭ رەسپۋبليكالىق ۇيىمى دەربەستىككە يە بولىپ, «قازاقستان رەسپۋبليكاسى ساۋلەتشىلەر وداعى» دەپ اتالا باستادى. وسى كەزەڭدە وداق تمد ساۋلەتشىلەر وداقتارىنىڭ حالىقارالىق قاۋىمداستىعىنىڭ (IASA) قۇرىلتايشىلارىنىڭ ءبىرى بولدى. سونىمەن قاتار حالىقارالىق ساۋلەتشىلەر وداعىنىڭ تەڭ قۇقىلى مۇشەسى.