«استانا وپەرا» مەملەكەتتىك وپەرا جانە بالەت تەاترىنىڭ جەتەكشى ءسوليسى ايگەرىم بەكەتاەۆاعا بۋداپەشت پەن لوندون بيىگىن باعىندىرۋ مۇمكىندىگى تۋىپ تۇر.
رەسەيدىڭ حالىق ءارتىسى بوريس ەيفماننىڭ بۇل تاڭداۋى نەگىزسىز دەپ ايتا المايسىز. ەلوردالىق ونەر ورداسى جاقىندا ماريا تەاترىنا گاسترولدىك ساپارمەن بارىپ قايتقان بولاتىن. سانكت-پەتەربۋرگ مەملەكەتتىك اكادەميالىق بالەت تەاترى ديرەكتورىنىڭ كوزىنە قازاقتىڭ قاعىلەز قارا قىزى شوقتاي باسىلا كەتتى. ايگەرىمنىڭ ساحنادا جانى ءۇزىلىپ كەتىپ بارا جاتقان اققۋدىڭ بەينەسىن سومداۋداعى كەرەمەت شەبەرلىگىنە ءتانتى بولعان رەجيسسەر جاس قىزدىڭ شىعار بيىگى مۇنان دا جوعارى بولارىن ىشتەي مويىنداپ قويدى. نە نارسەنى دە وتە مۇقيات تەكسەرىپ, زەرتتەپ بارىپ قانا ىشكى ويىمەن بولىسەتىن كانىگى مامان استانالىق اققۋدىڭ كاسىبي دەڭگەيىنە وتە جوعارى باعا بەردى. مۇنىڭ دالەلى – ونى ءوز ترۋپپاسىنا قوسىپ, ءساۋىر ايىنىڭ العاشقى كۇندەرى بۋداپەشتتە, ال 15-ءى مەن 19-ى ارالىعىندا لوندوندا, «كوليزەي» تەاترىندا وتەتىن گاسترولدىك ساپارعا ءدال وسى جۇلدىزبەن باراتىنىن جاريا ەتتى. رەسەيدىڭ حالىق ءارتىسىنىڭ بۇل ۇسىنىسىن ەلوردالىق ونەرپاز قۋانا قۇپ الدى.
ەسكە سالا كەتەتىن بولساق, ب.ەيفمان بۇعان دەيىن «استانا وپەرا» تەاترىندا «رودەن» بالەتىن ساحنالاعان بولاتىن. ال نازىك تە كوركەم قىز كاميللا كلودەلدىڭ بەينەسىن سومداۋىمەن كورەرمەن سۇيىسپەنشىلىگىنە يە بولعانى ءوز الدىنا بولەك اسەرگە بولەيدى. بۋداپەشت پەن لوندون ساپارىنا قايتا ورالساق, جاس ءارتىس ەۋروپالىق ساحنالاردا دا وسى ءرولدى ورىنداماق. بۇل ارينە, وڭاي ولجا ەمەس. سەبەبى, اتالمىش بالەتتىڭ حورەوگرافياسى ادەتتەگى كلاسسيكالىق شىعارماعا قاراعاندا وتە كۇردەلى ءارى وزىندىك ەرەكشەلىگى تاعى بار. مۇنداعى باستى كەيىپكەر ادامنىڭ دەنەسى جانە ونىڭ مۇمكىندىكتەرى بولىپ تابىلادى. جەتەكشى سوليستكە سوندىقتان وتە جوعارى جاۋاپكەرشىلىك جۇكتەلىپ وتىر. بىرىنشىدەن, بۇل «رودەن» بالەتىنىڭ لوندونداعى تۇساۋكەسەرى دەسەك, ەكىنشىدەن, بوريس ەيفمان ءوز ترۋپپاسىنا باسقا تەاتردان بىردە-ءبىر ءارتىستى تارتقان ەمەس, مۇنداي تاڭداۋدىڭ قازاق قىزىنا ءتۇسۋى جاي كەزدەيسوقتىق دەۋ دە جاڭساق پىكىر. جاس تەاتردىڭ بالەت ترۋپپاسىن, ونىڭ ىشىندەگى اسىرەسە, ايگەرىم بەكەتاەۆا سياقتى جارىق جۇلدىزداردى رەسەيلىك مايتالمان الدەقاشان مويىنداپ قويعان دەسەك, مىنە, وسى وي شىندىقپەن جاناساتىن پىكىر.
ءا.بەكەتاەۆا تۋرالى ناقتىلاي كەتسەك, ول – الماتىداعى ا.ۆ.سەلەزنەۆ اتىنداعى حورەوگرافيالىق ۋچيليششەنىڭ تۇلەگى. 2012 جىلى ۆارناداعى (بولگاريا) بالەت ارتىستەرىنىڭ, ءبىر جىلدان سوڭ رۋدولف نۋريەۆ اتىنداعى بالەت ارتىستەرىنىڭ حالىقارالىق كونكۋرستارىنىڭ لاۋرەاتى جانە بالەت ارتىستەرى مەن حورەوگرافتارىنىڭ XII حالىقارالىق كونكۋرسىنىڭ (ماسكەۋ) ديپلومانتى. بالەرينا ءوزى ءۇشىن جاڭا ەيفماندىق جانردى اشقانىن جانە بۇگىنگى تاڭدا الدىنا قويعان ماقساتقا جەتۋ جولىندا ايانباي تەر توگىپ جۇرگەنىن ايتادى. وسى رەتتە, ءوزىنىڭ ءبىراز جەتىستىككە قول جەتكىزە العانىن دا جاسىرمايدى. «مەن ءوز كەيىپكەرىمنىڭ قانداي سەزىم-كۇيدە, ەموتسيالىق جاعدايدا بولعانىن دالمە-ءدال جەتكىزۋ ءۇشىن ول جايلى كوپتەگەن كىتاپتار وقىپ, فيلمدەر كوردىم. وتە كوپ جۇمىس جاسالدى, ماعان دەيىن بۇل ءرولدى ويناعاندار ساحناداعى سەزىمدى مۇلتىكسىز جەتكىزىپ, سونداعى اتموسفەرانى ۇعىندىرا الۋ ءۇشىن ءتىپتى, جۇيكە اۋرۋلارىن ەمدەيتىن اۋرۋحانالارعا دەيىن باس سۇعۋعا تۋرا كەلگەنىن ايتتى», – دەيدى ول. ايگەرىم ارادا ءبىراز جىلدار وتكەندە ونىڭ كاميللاسى دا ادام تانىماستاي بولىپ وزگەرىپ شىعارىنا يمانداي سەنەدى.
بالەت ترۋپپاسىنىڭ كوركەمدىك جەتەكشىسى تۇرسىنبەك نۇرقاليەۆ «استانا وپەرا» تەاترىنىڭ سوليستەرى وزگە ەلگە بارىپ ونەر كورسەتۋگە كاسىبي جاعىنان وتە جوعارى دەڭگەيگە جەتكەنىن تىلگە تيەك ەتكەن ەدى. بۇل بايلام ەلوردالىق جاس تەاتر اتى مەن زاتى جاعىنان الەمدىك تەاترلارمەن سالىستىرعاندا كەم تۇسپەيدى دەگەن ءسوزدى ەش قىمسىنباي ايتا جۇرۋىمىزگە يتەرمەلەي تۇسەدى.
جەتىقارا قوڭىر.