قر پرەمەر-ءمينيسترى ءاليحان سمايىلوۆتىڭ توراعالىعىمەن وتكەن ينۆەستيتسيالىق احۋالدى جاقسارتۋ جونىندەگى كەڭەس (ياجك) وتىرىسىندا كليماتتىق پاكتى بويىنشا مىندەتتەمەلەردى قارجىلاندىرۋ جانە «جاسىل كۇن ءتارتىبىن» ىلگەرىلەتۋدەگى قازاقستاننىڭ حالىقارالىق ۇستانىمدارىن ودان ءارى نىعايتۋ ماسەلەلەرى قارالدى, دەپ حابارلايدى Egemen.kz.
قازاقستان العاشقىلاردىڭ قاتارىندا پاريج كەلىسىمىن راتيفيكاتسيالادى جانە ەكونوميكانى دەكاربونيزاتسيالاۋ جونىندەگى ەلەۋلى ماقساتتارى تۋرالى جاريالادى. قر ۇكىمەتى زاماناۋي تالاپتارعا ساي كەلەتىن دامۋدىڭ جاڭا باعىتتارىنا قاتىستى نەگىزگى قۇجاتتاردى دايىنداۋ بويىنشا ەداۋىر جۇمىس اتقارىپ جاتىر.
ءا. سمايىلوۆ 2021 جىلى مەملەكەتتىك ەكولوگيالىق رەتتەۋ ستاندارتتارىن ايقىندايتىن, جاسىل ينۆەستيتسيالار تارتۋدى ىنتالاندىراتىن جانە حالىقارالىق ەكولوگيالىق مىندەتتەمەلەردىڭ ورىندالۋىن قامتاماسىز ەتەتىن جاڭا ەكولوگيالىق كودەكس قابىلدانعانىن اتاپ ءوتتى.
«ەكولوگيالىق تازا ەنەرگيا كوزدەرىن دامىتۋدى ىنتالاندىرۋ ءۇشىن بالامالى ەنەرگەتيكانى دامىتۋ بويىنشا جاڭا زاڭ ازىرلەنىپ جاتىر. قازاقستاننىڭ 2025 جىلعا دەيىنگى ينۆەستيتسيالىق ساياساتىنىڭ جاڭا تۇجىرىمداماسى ESG جانە جاسىل ەكونوميكا قاعيداتتارىن ساقتاۋعا نەگىزدەلەتىن بولادى», دەدى قر پرەمەر-ءمينيسترى.
وسى ماقساتتار ءۇشىن قازىرگى تاڭدا 2060 جىلعا قاراي كومىرتەگى بەيتاراپتىلىعى دوكتريناسى ازىرلەنۋدە, ول قازاقستان ەكونوميكاسىن دايەكتى تۇردە ترانسفورماتسيالاۋ جونىندەگى مەملەكەتتىك ساياساتتىڭ ستراتەگيالىق باعىتىن ايقىندايدى.
قازاقستان الەمدە ورىن الىپ جاتقان سىن-تەگەۋرىندەرگە قاراماستان, ءوزىنىڭ جاھاندىق ورنىقتى دامۋعا بەيىلدىلىگىن ساقتاپ قالدى جانە اتالعان باعىتتاعى جۇيەلى جانە دايەكتى جۇمىستى ودان ءارى جالعاستىرۋعا دايىن.