ۇلتتىق بانك توراعاسى عالىمجان ءپىرماتوۆ كۇردەلى گەوساياسي احۋال جاعدايىندا قارجىلىق جانە باعا تۇراقتىلىعىن قامتاماسىز ەتۋ جونىندەگى شارالارى تۋرالى ايتتى.
«جاعداي وتە قيىن, بەلگىسىزدىك دەڭگەيى دە وراسان. سىرتقى سەكتوردا ەڭ جاعىمسىز قاۋىپ-قاتەرلەر مەن گەوساياسي تۇرعىدا تاۋەكەلدەر پايدا بولدى. ءبىز ۇكىمەتتەردىڭ, ورتالىق بانكتەردىڭ, قارجى جانە باسقا دا ۇيىمداردىڭ رەسەي فەدەراتسياسىنا قارسى سانكتسيالارعا قاتىستى مالىمدەمەلەرىن باقىلاپ, وسى سانكتسيالاردىڭ قازاقستانعا قالاي اسەر ەتەتىنىن باعالاپ وتىرمىز. قازاقستاندا قارجى جانە باعا تۇراقتىلىعىن قامتاماسىز ەتۋ ءۇشىن بارلىق قاجەتتى شارانى قابىلدايتىن بولامىز», دەدى ع.ءپىرماتوۆ.
اقپان ايىندا بازالىق مولشەرلەمەنىڭ 13,5%-عا دەيىن كەزەكتەن تىس كوتەرىلۋ سەبەپتەرىن تۇسىندىرگەن ۇلتتىق بانك باسشىسى رەسەي نەگىزگى ساۋدا ارىپتەسىمىز ەكەنىن, رۋبل باعامىنىڭ السىرەۋى تەڭگەگە دە قىسىم كورسەتكەنىن, مۇنداي جاعدايدا قازاقستاندا بازالىق مولشەرلەمەنى جەدەل ارتتىرۋ سىرتقى كۇيزەلىستەر سالدارىنىڭ ەل ەكونوميكاسىنا تارالۋىنىڭ الدىن الۋعا قاجەتتى شارا بولعانىن اتاپ ءوتتى.
ء«بىز قابىلداعان جەدەل شەشىم تەڭگەنىڭ ايىرباستاۋ باعامىنا كورسەتىلەتىن قىسىمدى, اتاپ ايتقاندا, الىپساتارلىق قىسىمدى تومەندەتۋگە مۇمكىندىك بەرىپ, ينفلياتسيالىق جانە دەۆالۆاتسيالىق كۇتۋلەردىڭ ءوسۋىن بولدىرماۋعا باعىتتالدى. مۇنداي داعدارىس جاعدايلارىندا جاۋاپكەرشىلىكتى ءوز موينىمىزعا الۋعا دايىن ەكەنىمىزدى كورسەتۋ ماڭىزدى. ءبىز ءوز ارەكەتتەرىمىزدى, ساۋداداعى وزگەرىستەر مەن ينتەرۆەنتسيالار تۋرالى اقپاراتتى اشىق جاريالاپ, نارىقپەن بولىسەمىز. مەنىڭ ويىمشا, بۇل ءدال قازىر وتە ماڭىزدى. بۇل بىزگە اقشا-كرەديت ساياساتىن جۇرگىزۋگە كومەكتەسەدى: اشىق ديالوگ پەن ءىس جۇزىندەگى ارەكەتتەرىمىزدىڭ جاريالىلىعىنا قاراپ-اق, نارىقتىڭ كاسىبي قاتىسۋشىلارى ورتالىق بانكتىڭ نە ىستەپ جاتقانىن جانە قازاقستاندا قارجىلىق تۇراقتىلىقتى ساقتاۋ ءۇشىن قاجەتتى بارلىق شەشىمدى قابىلداۋعا دايىن ەكەنىن بىلگەنى ءجون», دەدى ۇلتتىق بانك توراعاسى.
ع.ءپىرماتوۆ قازىرگى بازالىق مولشەرلەمەنى ساقتاۋ جونىندە شەشىم قابىلداۋعا اسەر ەتكەن فاكتورلار تۋرالى ايتا كەلىپ, كۇرت وزگەرىپ جاتقان جاعدايدى جانە بۇرىن-سوڭدى بولماعان بەلگىسىزدىك دەڭگەيىن ەسكەرىپ, بەلگىلى ءبىر ۋاقىتقا ءۇزىلىس جاسالعانىن جەتكىزدى. بۇل ۋاقىت نەگىزگى ىشكى جانە سىرتقى ماكروەكونوميكالىق ينديكاتورلاردىڭ وسى كۇتپەگەن وزگەرىستەرگە ىقپالى جونىندە جاڭا اقپارات جيناۋعا مۇمكىندىك بەرەدى.
«احۋال تۇبەگەيلى ناشارلاعان جاعدايدا بىزدە پايىزدىق ساياسات شەڭبەرىندە بۇدان بىلايعى شەشىمدەر قابىلداۋ ءۇشىن كەڭىستىك ساقتالىپ وتىر. ەگەر قارجى نارىقتارىندا قۇبىلمالىلىق ارتاتىنىن كورەتىن بولساق, ءبىز قارجى تۇراقتىلىعىنا نۇقسان كەلتىرمەستەن, اقشا-كرەديت تالاپتارىن ەلەۋلى تۇردە كۇشەيتە الامىز», دەدى ول.