اۋىل شارۋاشىلىعىنىڭ ءبىرىنشى ۆيتسە-ءمينيسترى ايداربەك ساپاروۆ ۇكىمەت وتىرىسىندا 2022 جىلعا ارنالعان ەگىس القاپتارىنىڭ بولجامدى قۇرىلىمىن اتاپ ءوتتى, دەپ حابارلايدى Egemen.kz.
«جالپى ەگىس القابى 23,1 ملن گا قۇرايدى, بۇل 2021 جىلدىڭ كورسەتكىشىنەن 125 مىڭ گا ارتىق. ءوندىرىستى ءارتاراپتاندىرۋ جانە مونوكۋلتۋرادان كەتۋ جالعاسۋدا, وسىعان بايلانىستى بيداي القابى 368,1 مىڭ گەكتارعا ازايادى, جەمشوپ داقىلدارىنىڭ الاڭى ەداۋىر ۇلعايتىلىپ, 3,6 ملن گەكتاردى قۇرادى», دەدى ايداربەك ساپاروۆ.
ونىڭ ايتۋىنشا, كوكونىس داقىلدارىنىڭ شامالى ءوسۋى بايقالادى, باقشا داقىلدارى 2 مىڭ گەكتارعا تومەندەدى, كۇرىش بويىنشا القاپ 6,5 مىڭ گەكتارعا ازايىپ, 89,9 مىڭ گا ەگىلەدى.
ىعىر, ماقسارى جانە قىشا سەكىلدى مايلى داقىلدار بويىنشا القاپتار 61,7 مىڭ گەكتارعا ازايادى دەپ بولجانۋدا, ال كۇنباعىس القاپتارى كەرىسىنشە ۇلعايتىلادى.
«وتكەن جىل كورسەتكەندەي, الدىن الا جوسپارلاۋ جانە قاجەتتى داقىلداردىڭ القاپتارىن ۇلعايتۋ بويىنشا جۇمىس ناتيجە بەرەدى. مىسالى, قاراقۇمىق بويىنشا. 2020 جىلى الاڭ 50 مىڭ گەكتارعا ۇلعايتىلدى, ناتيجەسىندە نارىقتا جارما تاپشىلىعى بايقالمايدى. بۇل قارقىندى جوعالتپاۋىمىز قاجەت, 100 مىڭ گا قاراقۇمىق ەگىسىنىڭ كورسەتكىشىن كەلەسى جىلى دا ساقتاۋ قاجەت. كارتوپ بويىنشا ءوسىم شامامەن 5 مىڭ گا قۇرايدى, ال بۇل 100-110 مىڭ توننا كارتوپ», دەپ قوستى ايداربەك ساپاروۆ.