بۇگىن, 31 ناۋرىز كۇنى باس پروكۋرور اسحات داۋىلباەۆتىڭ توراعالىق ەتۋىمەن ۆەدومستۆونىڭ كادر ساياساتى ماسەلەسىنە بايلانىستى جيىن وتكىزىلدى. بۇل تۋرالى باس پروكۋراتۋرانىڭ ءباسپاسوز قىزمەتى حابارلادى.
بەينەجەلى ارقىلى وتكىزىلگەن جيىنعا باس پروكۋراتۋرانىڭ قۇقىقتىق ستاتيستيكا جانە ارنايى ەسەپكە الۋ كوميتەتى باسقارما باسشىلارى مەن ايماقتىق پروكۋراتۋرا وكىلدەرى قاتىستى.
باس پروكۋرور ا. داۋىلباەۆ اتاپ وتكەندەي, پروكۋراتۋرا ورگاندارىندا ىستەيتىن كادرلاردىڭ ىسكەرلىك قابىلەتى جوعارى بولىپ, ادامگەرشىلىك قاعيداتىنا سىنا تۇسىرمەۋى ءتيىس. جيىندا ءمالىم بولعانىنداي, مەملەكەت باسشىسىنىڭ تاپسىرماسى بويىنشا ەكى باعدارلامالىق قۇجات – «قۇقىق قورعاۋ ورگاندارىنىڭ كادر ساياساتى تۇجىرىمداماسى» مەن «قۇقىق قورعاۋ جۇيەسىن ودان ءارى جاڭعىرتۋدىڭ 2014-2020 جىلدارعا ارنالعان مەملەكەتتىك باعدارلاماسى» ازىرلەنگەن. وندا بارلىق قۇقىق قورعاۋ ورگاندارىنىڭ كادر ساياساتىن كەزەڭ-كەزەڭمەن جەتىلدىرۋ كوزدەلدى.
قازىرگى كەزدە كادرلاردى ىرىكتەۋ مەن ورنالاستىرۋدىڭ, جاس مامانداردى ۇيرەتۋدىڭ, قىزمەتكەرلەردىڭ بىلىكتىلىگىن ارتتىرۋ مەن ولاردى الەۋمەتتىك قورعاۋدىڭ, ساپالى رەزەرۆتى قالىپتاستىرۋدىڭ, باسشىلاردىڭ جاۋاپكەرشىلىكتەرىن كۇشەيتۋدىڭ, جەكە قۇرام اراسىنداعى قۇقىق بۇزۋشىلىقتاردىڭ الدىن الۋدىڭ وزەكتى ماسەلەلەرى كۇن تارتىبىندە تۇر. ول بويىنشا قۇقىق قورعاۋ ورگانىنىڭ ابىرويىنا نۇسقان كەلتىرگەن ارەكەتتەرگە شارا قولدانىلادى.
ءامىرحان الماعانبەتوۆ.
دەرەككوز: باس پروكۋراتۋرانىڭ ءباسپاسوز قىزمەتى.
فوتو: www. Matritca.kz.