2022 جىلعى 4 ناۋرىز كۇنى S&P حالىقارالىق رەيتينگ اگەنتتىگى قازاقستان رەسپۋبليكاسىنىڭ تاۋەلسىز كرەديت رەيتينگىنىڭ «BBB-» دەڭگەيىندە راستادى, بولجامى «تۇراقتى». كرەديت رەيتينگىنە ورنىقتى فيسكالدىق پوزيتسيا, اۋقىمدى سىرتقى رەزەرۆتەر, مۇناي نارىعىنداعى جاعىمدى جاعداي سياقتى فاكتورلار قولداۋ كورسەتتى.
S&P پىكىرىنە قاراعاندا, گەوساياسي جاعداي قازاقستان مەن رەسەي اراسىنداعى تىعىز ساياسي, قارجىلىق جانە ەكونوميكالىق قارىم-قاتىناستارعا قاراماستان مەملەكەتتىڭ كرەديت رەيتينگىنە ىقپال ەتكەن جوق. رەسەيگە قاتىستى قابىلدانعان ەكونوميكالىق سانكتسيالاردىڭ قوسىمشا اسەرى رەتتەۋگە كەلەدى جانە قازاقستان ءۇشىن ەڭ ماڭىزدى ەكسپورت نارىقتارىنا قولجەتىمدىلىگىن شەكتەمەيدى.
كرەديت رەيتينگىنىڭ ساقتالۋىنىڭ شەشۋشى فاكتورى رەتىندە مەملەكەتتىك بورىش دەڭگەيىنىڭ تومەندىگى مەن ايتارلىقتاي ءوتىمدى اكتيۆتەرمەن ەرەكشەلەنەتىن مەملەكەتتىڭ تۇراقتى فيسكالدىق پوزيتسياسىن قاراستىرۋعا بولادى. S&P ساراپشىلارىنىڭ پىكىرىنە سۇيەنسەك, ۇلتتىق قوردان بيۋدجەتكە اۋدارىلاتىن ترانسفەرتتەردىڭ كولەمىن شەكتەيتىن بيۋدجەتتىك ەرەجەنى باسشىلىققا الۋ جانە مۇناي ءوندىرىسىنىڭ كولەمىن ارتتىرۋ قازاقستانعا تۇراقتى فيسكالدىق پوزيتسياسىن ساقتاۋعا مۇمكىندىك بەرەدى. قازاقستاننىڭ سىرتقى رەزەرۆتەرىنىڭ كولەمى ايتارلىقتاي دەڭگەيدە ساقتالعان, ال سىرتقى قارجىلاندىرۋعا مۇقتاجدىعى تومەن.
2022 جىلى ءىجو-ءنىڭ ءوسىمىن S&P 3,6% دەڭگەيىن قۇرايدى دەپ بولجايدى. اگەنتتىك ينفلياتسيا 2021 جىلى ۇلتتىق بانك ورناتقان 4-6% دالىزدەن جوعارى ورتا ەسەپپەن العاندا 8%-دى قۇراعانىن جانە بۇل جاعداي ىسكە اسىرىلىپ وتىرعان ىنتالاندىرۋشى فيسكالدىق ساياسات پەن يمپورتتىق تاۋارلاردىڭ باعاسىنىڭ وسۋىنە بايلانىستى ورىن العانىن اتاپ ءوتتى. S&P بولجامىنا سايكەس, ينفلياتسيا ءوسىمى 2025 جىلعا قاراي باياۋلاپ 5%-دى قۇرايتىن بولادى. اگەنتتىك قۇبىلمالىق جاعدايىندا ۇلتتىق بانك باعالار تۇراقتىلىعىن ساقتاپ قالۋ ماقساتىندا بازالىق مولشەرلەمەنى 13,5%-عا دەيىن جوعارىلاتقانىن اتاپ ءوتتى.
ساراپشىلار ۇلتتىق بانكتىڭ ءوز مانداتىن نىعايتۋ مەن ترانسپارەنتتىگىن كۇشەيتۋگە باعىتتالعان ارەكەتىنە وڭ باعاسىن بەردى. S&P ساراپشىلارىنىڭ پىكىرىنە قاراعاندا, ۇلتتىق بانكتىڭ 2023 جىلى ەكونوميكانى قولداۋ باعدارلامالارىنان شىعۋ بويىنشا جوسپارلارى, قارجى مينيسترلىگىمەن بىرىگىپ ىشكى قايتالاما نارىقتاعى وتىمدىلىكتى ارتتىرۋ ماقساتىندا تابىستىلىق قيسىعىن قۇرۋعا باعىتتالعان جۇمىسى مونەتارلىق ساياساتتىڭ ترانسميسسيالىق ارناسىن كۇشەيتەتىن بولادى. سونىمەن قاتار ۇلتتىق بانك قۇزىرەتىنەن قارجىلىق رەتتەۋ بويىنشا قىزمەتىنىڭ شىعارىلۋى ماكروەكونوميكالىق تۇراقتىلىققا باسا نازار اۋدارۋعا مۇمكىندىك بەردى.
S&P ساراپشىلارى ايىرباستاۋ باعامىنىڭ ەركىن وزگەرمەلىلىگى ەكونوميكانىڭ سىرتقى قىسىمعا بەيىمدەلۋىنە كومەكتەسكەنىن اتاپ ءوتتى. S&P باعالاۋىنشا, تەڭگە باعامى 2022 جىلدىڭ ەكىنشى جارتىسىندا نىعايادى.
اگەنتتىك ساراپشىلارىنىڭ پىكىرىنشە, كرەديت رەيتينگىنىڭ ديناميكاسى مەملەكەتتىك باسقارۋ, مەملەكەتتىك ينستيتۋتتار ساياساتىنىڭ ودان ءارى جەتىلدىرىلۋى مەن مونەتارلىق ساياسات تيىمدىلىگى جانە بانك سەكتورىنىڭ جاعدايىنا تاۋەلدى.