قر ەڭبەك جانە حالىقتى الەۋمەتتىك قورعاۋ مينيسترلىگىمۇددەلى مەملەكەتتىك ورگاندارمەن, جۇمىسكەرلەردىڭ, جۇمىس بەرۋشىلەر مەن بيزنەستىڭ وكىلدەرىمەن بىرلەسىپ, كاسىپتىك بىلىكتىلىك تۋرالى قۇجاتتى جانە ىلەسپە زاڭ جوباسىن ازىرلەدى, دەپ حابارلايدى Egemen.kz.
مەملەكەت باسشىسى 2021 جىلعى 1 قىركۇيەكتەگى «حالىق بىرلىگى جانە جۇيەلى رەفورمالار – ەلدىڭ وركەندەۋىنىڭ بەرىك نەگىزى» اتتى قازاقستان حالقىنا جولداۋىندا كوروناۆيرۋس ينفەكتسياسىنىڭ تارالۋىنان تۋىنداعان دۇنيەجۇزىلىك پاندەميا ەڭبەك نارىعىنىڭ ايتارلىقتاي وزگەرۋىنە اكەلگەنىن اتاپ ءوتتى. كوپتەگەن جاڭا كاسىپتەردىڭ پايدا بولۋى, كوپتەگەن پروتسەستەردى اۆتوماتتاندىرۋ جانە تسيفرلاندىرۋ اياسىندا جەكە باسەكەگە قابىلەتتىلىك جاڭا كاسىپتەردى بىرنەشە رەت قايتا دايارلاۋ ءارى دامىتۋ ارقىلى قامتاماسىز ەتىلۋى مۇمكىن.
«مەملەكەت باسشىسىنىڭ تاپسىرماسىن ورىنداۋ ءۇشىن ەڭبەكمينى «كاسىپتىك بىلىكتىلىك تۋرالى» جانە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كاسىپتىك بىلىكتىلىك ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوبالارىن ازىرلەدى. ولار ۇلتتىق بىلىكتىلىك جۇيەسىندە بەلگىلى ءبىر كاسىپ ءتۇرىن نەمەسە ەڭبەك قىزمەتىنىڭ ءتۇرىن جۇزەگە اسىرۋعا ۇمىتكەر جەكە تۇلعانىڭ كاسىپتىك بىلىكتىلىگىن تانۋ تارتىبىنە بايلانىستى قوعامدىق قاتىناستاردى رەتتەۋگە باعىتتالعان», دەلىنگەن ەڭبەك مينيسترلىگى مالىمەتىندە.
نەگىزگى زاڭ جوباسىندا كاسىپتىك بىلىكتىلىكتەردى تانۋدىڭ ەكى ءتاسىلى كوزدەلگەن:
- مىندەتتى نەگىزدە – قر سالالىق زاڭنامالىق اكتىلەرىندە بەلگىلەنگەن قولدانىستاعى ءتارتىپ نەگىزىندە جۇرگىزىلەدى;
- ەرىكتى نەگىزدە – ءوز بەتىنشە جانە جۇمىس بەرۋشىنىڭ جولداماسى بويىنشا ءوتىنىش جاساعان, بەلگىلى ءبىر قىزمەت ءتۇرىن, ەڭبەك قىزمەتىن جۇزەگە اسىرۋعا ۇمىتكەر كانديداتتى سەرتيفيكاتتاۋ جولىمەن جۇرگىزىلەدى.
سونداي-اق زاڭ جوباسىندا كانديداتتاردىڭ كاسىپتىك بىلىكتىلىكتەردى تانۋ راسىمىنەن ءوتۋ قۇقىقتارى, كاسىپتىك بىلىكتىلىكتەردى ەرىكتى نەگىزدە تانۋ شارتتارى مەن ءتارتىبى ايقىندالادى.
بۇدان باسقا, كاسىپتىك بىلىكتىلىكتەردى تانۋ جۇيەسىنە ەرىكتى نەگىزدە كىرۋ ءۇشىن مىناداي ىنتالاندىرۋ شارالارى كوزدەلگەن:
- جۇمىس بەرۋشىلەر جىبەرەتىن كانديداتتارعا قازاقستان رەسپۋبليكاسىنىڭ ەڭبەك زاڭناماسىندا بەلگىلەنگەن تارتىپپەن كەپىلدىكتەر مەن جەڭىلدىكتەر بەرۋ;
- جۇمىس بەرۋشىنىڭ قىزمەتىن دەكلاراتسيالاۋ كەزىندە كاسىپتىك بىلىكتىلىكتەردى تانۋدى ەسەپكە الۋ;
- حالىقتى جۇمىسپەن قامتۋ ورتالىعىنا جۇمىس ىزدەۋشى رەتىندە جۇگىنگەن جۇمىسسىز تۇلعالارعا ءبىر رەتتىك ۆاۋچەر بەرۋ. وسى ۆاۋچەردىڭ نەگىزىندە جۇمىسسىز ادام رەسپۋبليكالىق بيۋدجەت قاراجاتى ەسەبىنەن كاسىپتىك بىلىكتىلىگىن مويىنداۋدان وتەدى;
- مەملەكەتتىك باسقارۋدىڭ جەكەلەگەن سالالارىندا كاسىپتەر بويىنشا كاسىپتىك بىلىكتىلىكتەردى تانۋ ورتالىقتارىن قۇرۋ كەزىندە جەكەلەگەن شىعىستاردى سۋبسيديالاۋ.
«زاڭ جوبالارىن قابىلداۋ قىزمەتكەرلەرگە, جۇمىسسىزدارعا ءارى ىزدەنۋشىلەرگە تەز ءارى ساپالى جۇمىسقا ورنالاسۋعا جانە جوعارى تابىس تابۋعا مۇمكىندىك بەرەدى. ءوز كەزەگىندە جۇمىس بەرۋشىلەر قىزمەتكەرلەردىڭ كاسىبي جارامدىلىعى دەڭگەيىنىڭ ناقتى تاۋەلسىز باعاسىن الا الادى, بىلىكتى مامانداردى جالداي الادى جانە ەڭبەك ونىمدىلىگىن ارتتىرا الادى», دەپ اتالىپ وتكەن ۆەدومستۆو حابارلاماسىندا.