قازاقستان رەسپۋبليكاسى توتەنشە جاعدايلار ۆيتسە-ءمينيسترى مارات كۇلدىكوۆ ناۋرىزدىڭ 3-ءى كۇنى ورال قالاسىندا باتىس قازاقستان وبلىسىنىڭ قۇتقارۋشىلارىنا جاۋىنگەرلىك تۋ تابىس ەتتى, دەپ جازادى Egemen.kz.
حاديشا بوكەەۆا اتىنداعى باتىس قازاقستان وبلىستىق قازاق دراما تەاترىندا وتكەن سالتاناتتى جيىندا قازاقستان رەسپۋبليكاسى توتەنشە جاعدايلار ءمينيسترىنىڭ ورىنباسارى مارات كۇلدىكوۆ وبلىستىڭ باس قۇتقارۋشىسى ەرنۇر وتەگەنوۆكە كاسىبي ەرلىك, قۇرمەت پەن باتىلدىقتىڭ سيمۆولى – جاۋىنگەرلىك تۋدى تابىس ەتتى.
«مەملەكەت باسشىسى ازاماتتاردىڭ قاۋىپسىزدىگىنە ەرەكشە كوڭىل بولەدى. بۇل ءۇشىن ءبىز توتەنشە جاعدايلاردىڭ الدىن الۋ جانە جويۋ بويىنشا مىندەتتەرىمىزگە ادال بولۋىمىز كەرەك. وتكەن جىلدىڭ قازان ايىندا پرەزيدەنت جارلىعىمەن مينيسترلىكتىڭ جانە ونىڭ اۋماقتىق بولىمشەلەرىنىڭ سيمۆولى رەتىندە تۋ بەكىتىلدى. تاۋەلسىزدىك جىلدارىندا قۇتقارۋشىلاردىڭ ءوز ءومىرىن قيىپ جاساعان ەرلىگى جەتەرلىك. سوندىقتان بۇگىنگى كۇن دەپارتامەنتتىڭ بارلىق ۇجىمى ءۇشىن ايتۋلى وقيعا», دەدى توتەنشە جاعدايلار ۆيتسە-ءمينيسترى.
كەزدەسۋ بارىسىندا مينيستر ورىنباسارى جەكە قۇرامعا قازاقستان رەسپۋبليكاسى پرەزيدەنتى قاسىم-جومارت توقاەۆتىڭ, توتەنشە جاعدايلار ءمينيسترى يۋ. ءيليننىڭ تاپسىرمالارىن جەتكىزىپ, مينيسترلىك تاراپىنان اتقارىلىپ جاتقان جۇمىس جونىندە ايتىپ بەردى. قۇتقارۋشىلار مەن ءورت سوندىرۋشىلەر ءوز ساۋالدارىن قويىپ, تۇششىمدى جاۋاپ الدى. جيىن اياقتالعان سوڭ مارات كۇلدىكوۆ بىرقاتار ءورت ءسوندىرۋ بولىمدەرىن ارالاپ شىقتى.
ايتا كەتەيىك, 2022 جىلعى 3-4 ناۋرىز ارالىعىندا رەسپۋبليكالىق «كوكتەم – 2022» كوماندالىق-شتابتىق وقۋ-جاتتىعۋى ءوتىپ جاتىر. جاتتىعۋدىڭ ماقساتى – توتەنشە جاعدايلاردىڭ الدىن الۋ جانە ولاردى جويۋ كەزىندە ازاماتتىق قورعاۋ مەملەكەتتىك جۇيەسىنىڭ ءىس-قيمىلدارىن تەكسەرۋ.
بيىل رەسپۋبليكالىق وقۋ-جاتتىعۋ شتابى باتىس قازاقستان وبلىسىندا ورنالاسقان. قازىر ورتالىق مەملەكەتتىك ورگاندار مەن توتەنشە جاعدايلار مينيسترلىگىنىڭ جاۋاپتى ماماندارى وبلىس اۋماعىندا ءجۇر. اتالعان وقۋ-جاتتىعۋلارعا قازاقستان رەسپۋبليكاسى ۇلتتىق ۇلانىنىڭ 5517 اسكەري ءبولىمى, ازاماتتىق قورعاۋ قىزمەتتەرىنىڭ كۇشتەرى مەن قۇرالدارى جۇمىلدىرىلعان.
باتىس قازاقستان وبلىستىق توتەنشە جاعدايلار دەپارتامەنتىنىڭ ءباسپاسوز قىزمەتى مالىمدەگەندەي, شاراعا 2381 ادام, 732 تەحنيكا, 68 ءجۇزۋ قۇرالى قاتىسۋدا. وقۋ-جاتتىعۋلارعا «قازاۆياقۇتقارۋ» اق اۋە كەمەلەرى دە تارتىلعان.