مادەنيەت جانە سپورت ءمينيسترى داۋرەن اباەۆ قازاقستانداعى سپورت فەدەراتسيالارىنىڭ سۋديالارىن دايارلاۋعا قاتىستى ماسەلە كوتەردى, دەپ حابارلايدى Egemen.kz.
مادەنيەت جانە سپورت ءمينيسترى اتاپ وتكەندەي, «دەنە شىنىقتىرۋ جانە سپورت تۋرالى» قر زاڭىنا سايكەس سپورت فەدەراتسيالارى بارلىق ساناتتاعى سپورت تورەشىلەرىن دايارلاۋدى جۇزەگە اسىرۋعا مىندەتتى.
«بۇگىنگى تاڭدا ەلىمىز بويىنشا 4 276 سۋديا بار. ولاردىڭ 413-ءى حالىقارالىق ساناتقا يە, تەك 12 سۋديا توكيوداعى وليمپيادا ويىندارىندا تورەشىلىككە تارتىلدى. بۇل فاكتىلەر وسى باعىتتاعى جۇمىستىڭ ناشارلىعىن كورسەتەدى», دەدى ۆەدومستۆونىڭ كەڭەيتىلگەن القا وتىرىسىندا.
ءمينيستردىڭ ايتۋىنشا, فەدەراتسيالاردىڭ سۋديالاردى دايىنداۋعا قىزىعۋشىلىق تانىتپاۋى تومەن جالاقىدان تۋىندايتىنىن ايتتى.
«ششۋچينسكىدە سپورت جارىستارىنىڭ ءبىر كۇنىنە قىزمەت كورسەتۋ ءۇشىن تورەشىلەرگە 1 239 تەڭگەدەن تولەنەتىنىن ايتقان بولاتىنمىن. وسىعان بايلانىستى ءبىز سپورت تورەشىلەرىنىڭ ەڭبەكاقىسىن تاريفتەۋدى ارتتىرۋ بويىنشا ۇسىنىستار دايىنداۋدامىز. بۇل ءىس جۇزىندە ەرىكتى, اقى تولەنبەيتىن جۇمىس. سوندىقتان بۇل جۇيەنى قولعا الۋ قويۋ كەرەك», دەپ ەسەپتەيدى داۋرەن اباەۆ.