ماسكەۋدە قازاقستان رەسپۋبليكاسى پرەمەر-ءمينيسترىنىڭ ءبىرىنشى ورىنباسارى باقىتجان ساعىنتاەۆتىڭ قاتىسۋىمەن ەۋرازيالىق ەكونوميكالىق كوميسسيا كەڭەسىنىڭ كەزەكتى وتىرىسى ءوتتى.
كەڭەس وتىرىسىندا كەدەن وداعى مەن بىرىڭعاي ەكونوميكالىق كەڭىستىكتى ودان ءارى دامىتۋدىڭ كوكەيكەستى ماسەلەلەرى قارالدى. سونىڭ ءبىرى ەۋرازيالىق ەكونوميكالىق وداق تۋرالى كەلىسىم جوباسىن ازىرلەۋ جايى بولدى.
ارىپتەس ەلدەرمەن بىرگە كەلىسىم جوباسىن دايىنداۋ بارىسىنداعى نەگىزگى تۇستار, سونداي-اق, مەملەكەتتەردىڭ ءوزارا ءتيىمدى مۇددەلەرىن قاناعاتتاندىرۋعا جانە ينتەگراتسيانى ودان ءارى دامىتۋعا باعىتتالعان ەرەجەلەر تالقىلاندى.
اتاپ ايتقاندا, ساۋدا ساياساتى ماسەلەلەرى, تەحنيكالىق رەتتەۋ جانە سانيتارلىق-فيتوسانيتارلىق شارالار بويىنشا جەمىستى تالقىلاۋلار بولدى.
ەكونوميكانى دامىتۋدىڭ ونەركاسىپتىك جانە اگروونەركاسىپتىك, ۆاليۋتا ساياساتى, قارجى رىنوكتارى سياقتى نەگىزگى سەكتورلارى بويىنشا تاراپتار ورتاق پىكىرگە كەلىپ, اتالعان سالالاردى ءوزارا ءتيىمدى دامىتۋ مۇمكىندىكتەرى كەلىسىم جوباسىنا ەنگىزىلدى.
سونداي-اق, باسەكەلەستىكتى دامىتۋ, كولىك, ەنەرگەتيكا جانە تابيعي مونوپوليالار سالالارىنداعى ىنتىماقتاستىق ماسەلەلەرى قارالدى.
تۇتاستاي العاندا, كەلىسىم جوباسىن دايىنداۋدى تالقىلاۋ قورىتىندىسى بارىسىندا, ءوزارا ءتيىمدى ارىپتەستىكتىڭ نەگىزگى قىرلارى بويىنشا ەلەۋلى تابىسقا قول جەتكىزىلدى.
بۇدان باسقا, كەدەن وداعىندا تۇتىنىلاتىن جوعارى تەحنولوگيالىق سالا ءۇشىن ماتەريالدار ءوندىرۋدى دامىتۋ ماقساتىندا اكەلىنەتىن سيرەك مەتالدارعا قاتىستى باج سالىعىن تومەندەتۋ تۋرالى شەشىم قابىلداندى.
ەكونوميكالىق ينتەگراتسيانى دامىتۋ باعىتىنداعى بىرلەسكەن جۇمىس مەملەكەتتەردىڭ تەڭ قۇقىقتى قارىم-قاتىناس الەۋەتىن ءتيىمدى پايدالانۋعا پەيىلدى ەكەندىكتەرىنىڭ جارقىن كورىنىسى بولىپ تابىلادى, دەپ حابارلادى قازاقستان پرەمەر-ءمينيسترىنىڭ باسپاسوز قىزمەتى.