ادام ءومىرىنىڭ جالعاسى بالادان ارتىق بايلىق بار ما؟ كوپ اقشا دا, دۇنيە-م ۇلىك تە بايلىق بولا المايدى. ال ۇرپاقتىڭ ءجونى بولەك. ءتۇن ۇيقىسىن ءتورت بولەتىن ءار انا رەتىندە مەن دە باۋىر ەتىم – بالالارىمنىڭ امان-ەسەن وسكەنىن قالايمىن.
الايدا تولعاۋى توقسان تىرشىلىككە تولى مىنا زاماندا قاۋىپ-قاتەردىڭ اياقاستىندا ەكەنىن ەسكەرە بەرمەيمىز. ەكى جىل بۇرىن ەكى جاسار ءسابيىمدى قاباعان يت تالاپ, ءولىمشى ەتكەنى ءالى كۇنگە ەسىمنەن كەتەر ەمەس. سول ساتتە جانىمدى قويارعا جەر تاپپادىم. بالامنىڭ جاراقاتى وتە اۋىر بولدى. جەدەل جاردەم بريگاداسىن شاقىردىق.
اتىراۋ قالاسىنىڭ شەتىنەن جاڭادان بوي كوتەرگەن «جۇلدىز» شاعىن اۋدانىندا تۇرامىز. شاعىن اۋدانعا جەدەل جاردەم بريگاداسىنىڭ كەلۋىن كۇتەتىن ۋاقىت بولمادى. وقيعا بولعان جەرگە پوليتسيا قىزمەتكەرلەرى جەدەل جەتتى. ۋچاسكەلىك پوليتسيا ينسپەكتورى قانات يسپۋسينوۆ جەدەل جاردەمدى كۇتپەي, جاراقاتى اۋىر بالامدى كولىگىمەن وبلىستىق بالالار اۋرۋحاناسىنا الا جونەلدى. پوليتسيا ينسپەكتورى وسىلاي جەدەل ارەكەت ەتىپ, جاراقات العان بالامنىڭ امان قالۋىنا قولۇشىن سوزدى.
قاباعان يت بالامنىڭ باس سۇيەگىن, قولىن تىستەگەن. اۋرۋحانا دارىگەرلەرى بالامنىڭ دەنەسىندەگى يت تىستەگەننەن قالعان جاراقاتىنا حيرۋرگيالىق وڭدەۋ جۇرگىزىپ, ءتيىستى ەم-دومىن جاسادى. ءبىراز كۇن اۋرۋحانانىڭ تراۆماتولوگيا بولىمىندە ەمدەلدى. ال پوليتسيا قىزمەتكەرلەرى جەدەل ىزدەستىرۋ ءىس-شاراسىن قولعا الىپ, قاباعان ءيتتى دە, ونىڭ يەسىن دە تاپتى.
مەن پوليتسيا ينسپەكتورىنا, دارىگەرلەرگە بالامنىڭ امان قالۋىنا كومەگىن بەرگەنى ءۇشىن انالىق العىسىمدى ءبىلدىرۋدى ءجون سانادىم.
ايگەرىم ايىنعازيەۆا,
اتىراۋ قالاسىنىڭ تۇرعىنى