دەنساۋلىق ساقتاۋ مينيسترلىگى ەمدەۋگە ارنالعان بىرجولعى زەينەتاقى تولەمدەرىن پايدالانۋ قاعيدالارىنا وزگەرىستەر ەنگىزىلەتىن بۇيرىق جوباسىن دايىندادى, دەپ حابارلايدى Egemen.kz.
وزگەرىستەرگە سايكەس الۋشىنىڭ بىرجولعى زەينەتاقى تولەمدەرىن ءوز بالاسىن ەمدەۋگە پايدالانۋىنا جول بەرىلەدى.
سونداي-اق جۇبايىنىڭ نەمەسە جاقىن تۋىستارىنىڭ زەينەتاقى جيناقتارىن پايدالانۋعا بولادى. بۇل ءۇشىن تاراپتار الۋشىنىڭ جەكە كابينەتىندە بىرجولعى زەينەتاقى تولەمدەرىن بەرۋ تۋرالى كەلىسىم جاساسادى, ول نەكەنى نەمەسە تۋىستىق قاتىناستاردى راستايتىن قۇجاتتاردى قوسا بەرە وتىرىپ, ولاردىڭ ەتسق-مەن كۋالاندىرىلادى.
قورىتىندىنى العاننان كەيىن ءوتىنىش بەرۋشى مەديتسينالىق ۇيىمدى تاڭدايدى جانە شارتتىڭ نەمەسە تولەم شوتىنىڭ سكانەرلەنگەن نۇسقاسىن ءارى قاراي تىركەي وتىرىپ, ۋاكىلەتتى وپەراتوردىڭ ينتەرنەت-رەسۋرسىنداعى ءوزىنىڭ جەكە كابينەتىندە دارىگەرلىك كوميسسيانىڭ قورىتىندىسىن قوسا بەرەدى. كەيىن مەديتسينالىق قىزمەتتەر كورسەتۋ تۋرالى شارت جاساسادى.
ءوز كەزەگىندە, ۋاكىلەتتى وپەراتور الۋشى ۇسىنعان قۇجاتتار بىرجولعى زەينەتاقى تولەمدەرىنىڭ نىسانالى ماقساتىنا سايكەس كەلگەن كەزدە الۋشىدان قۇجاتتاردى العان كۇننەن باستاپ 10 جۇمىس كۇنى ىشىندە بىرجولعى زەينەتاقى تولەمدەرىنىڭ نىسانالى پايدالانىلۋىن تەكسەرەدى.
ەمدەلۋگە اقى تولەۋگە ارنالعان بىرجولعى زەينەتاقى تولەمدەرىنىڭ نىسانالى پايدالانىلۋىن راستايتىن قۇجاتتار مىنالار بولىپ تابىلادى:
قورىتىندى; مەديتسينالىق ۇيىم مەن الۋشى اراسىندا جاسالعان مەديتسينالىق قىزمەتتەر كورسەتۋ تۋرالى شارت نەمەسە دارىلىك زاتتاردى ساتىپ الۋعا ساتۋشى مەن الۋشى اراسىنداعى شارت.مەديتسينالىق قىزمەتتەردى شەتەلدە الۋ كەزىندە دەرەكتەمەلەردى (تولەم شوتىن) كورسەتە وتىرىپ, تولەمدى جۇزەگە اسىرۋ ءۇشىن قاجەتتى قۇجاتتى نەمەسە مەديتسينالىق ۇيىم مەن الۋشى اراسىندا جاسالعان مەديتسينالىق قىزمەتتەردى كورسەتۋ تۋرالى شارتتى (قۇجاتتار شەت تىلىندە جاسالعان جاعدايلاردا نوتاريالدى كۋالاندىرىلعان اۋدارماسىن قوسا بەرە وتىرىپ) ۇسىنۋعا جول بەرىلەدى.
بۇيرىق جوباسى 14 ناۋرىزعا دەيىن جاريا تالقىلاۋ ءۇشىن «اشىق نقا» سايتىندا ورنالاستىرىلعان.