«قازگيدرومەت» رمك كوكتەمنىڭ العاشقى ءۇش كۇنىنە ارنالعان اۋا رايى بولجامىن جاريالادى, دەپ حابارلايدى Egemen.kz.
كوكتەمنىڭ العاشقى كۇندەرىندە قازاقستان اۋماعىندا تۇراقسىز اۋا رايى كۇتىلەدى. فرونتالدىق بولىكتەردىڭ وتۋىمەن, سولتۇستىك جارتىدا نەگىزىنەن قار تۇرىندە جاۋىن-شاشىن, تومەنگى بوران مەن جەلدىڭ كۇشەيۋى, وڭتۇستىكتە نايزاعاي مەن جاڭبىر جاۋادى.
«رەسپۋبليكا بويىنشا تۇمان, كوكتايعاق بولجانادى. اۋا تەمپەراتۋراسى تومەندەيدى: باتىستا تۇندە 2...10 ايازعا دەيىن, كۇندىز 2...15-كە دەيىن جىلۋ; رەسپۋبليكانىڭ سولتۇستىگىندە, شىعىسىندا جانە ورتالىعىندا تۇندە تەرمومەتر باعاندارى 15...20 گرادۋسقا دەيىن تومەندەيدى, كۇندىز نەگىزگى فون 0...10 اياز; ەلدىڭ وڭتۇستىك جانە وڭتۇستىك-شىعىس جارتىسىندا تۇندە 0...8 اياز, كۇندىز 5...15 جىلۋ بولادى», دەلىنگەن سينوپتيكتەر بولجامىندا.