بۇگىن داڭقتى بوكسشى فلويد مەيۆەزەر 45 جاسقا تولدى. شيرەك عاسىر بويى شارشى الاڭدى ارمانسىز شايقاعان ول 50 رەت جەكپە-جەككە شىعىپ, بارلىعىندا جەڭىسكە جەتتى. 27 قارسىلاسىن ەسىنەن تاندىردى. ءسويتىپ امەريكالىق ساڭلاق سپورتتىق مانسابىندا بىردە-ءبىر رەت جەڭىلىستىڭ كەرمەك ءدامىن تاتپاعان جەر-جاھانداعى ساناۋلى عانا بوكسشىلاردىڭ ءبىرى رەتىندە تاريحتا قالدى.
فلويد 1977 جىلدىڭ 24 اقپانىندا اقش-تىڭ ميچيگان شتاتىنداعى گراند-راپيدس قالاسىندا دۇنيەگە كەلدى. ونىڭ اكەسى دە كەزىندە مىقتى بوكسشى بولعان. ۇلكەن مەيۆەزەر وتكەن عاسىردىڭ 70-جىلدارىنىڭ اياعىندا داڭقى جەر جارعان رەي «شۋگار» لەوناردتىڭ وزىمەن جۇدىرىقتاسقان. ونىڭ اعالارى مەن تۋعان-تۋىستارىنىڭ اراسىندا دا تانىمال بىلعارى قولعاپ شەبەرلەرى از بولعان جوق. ءبىر سوزبەن ايتساق, اۋلەتتەرى تۇگەل بوكسشىلار. سولارعا ەلىكتەگەن فلويد تا وسى سپورت تۇرىنە مىقتاپ دەن قويدى. اۋەلى ول اۋەسقويلار اراسىندا تانىلدى.
1996 جىلى اتلانتادا الاۋى تۇتانعان وليمپيا ويىندارىندا قولا مەدالدى يەلەندى. باستاپقى باسەكەدە 19 جاستاعى دارىن يەسىنىڭ ءبىزدىڭ باقتيار تىلەگەنوۆتى جەڭگەنى ەسىمىزدە. ودان كەيىن ارمەنيالىق ارتۋر گەۆوركيان مەن كۋبالىق لورەنتسو اراگوننان ايلاسىن اسىردى. بىراق جارتىلاي فينالدا جولدى بولمادى. امەريكالىق ورەن بولگاريانىڭ اتاقتى بوكسشىسى, ءۇش دۇركىن الەم جانە ءۇش دۇركىن ەۋروپا چەمپيونى سەرافيم تودوروۆتان ءبىر عانا ۇپاي ايىرماشىلىعىمەن جەڭىلىپ, وليمپيادا چەمپيونى اتانسام دەگەن اسقاق ارمانىمەن قوش ايتىستى. اۋەسقويلار اراسىندا بارلىعى 90 كەزدەسۋ وتكىزگەن فلويد سونىڭ 84-ىندە جەڭىس تويىن تويلادى.
1996 جىلدىڭ 11 قازانىندا فلويد مەيۆەزەر كاسىپقوي رينگتەگى تۇساۋكەسەر كەزدەسۋىن وتكىزىپ, مەكسيكالىق روبەرتو اپوداكانى ەكىنشى راۋندتا ۇرىپ جىقتى. ال ونىڭ سودان كەيىنگى ءجۇرىپ وتكەن جولى بارشا جانكۇيەردىڭ كوز الدىندا. شيرەك عاسىر ارالىعىندا ول ديەگو كوررالەس, حەسۋس چاۆەس, لۋيس كاستيلو, دەماركۋس كورلي, ارتۋرو گاتتي, شارمبا ميتچەلل, زاب دجۋدا, كارلوس مانۋەل بالدومير, وسكار دە لا حويا, ريككي حاتتون, حۋان مانۋەل ماركەس, شەين موسلي, ۆيكتور ورتيس, ميگەل كوتتو, روبەرت گەررەرو, ساۋل الۆارەس, ماركوس مايدانا, مەنني پاكياو جانە اندرە بەرتو سىندى اتتارى اڭىزعا اينالعان ساڭلاقتاردى سان سوقتىردى. وسىلايشا, ول ەشكىمنەن جەڭىلمەگەن كۇيى بىلعارى قولعابىن شەگەگە ءىلدى.
مەيۆەزەرگە كوپتەگەن رەكورد تيەسىلى. اتاپ ايتساق, ول بەس سالماق دارەجەسى بويىنشا ەڭ بەلدى نۇسقالارىنىڭ التىن بەلبەۋىن يەلەندى. 1998 جىلدىڭ 3 قازانىندا العاش رەت الەم چەمپيونى اتانعان اقش بوكسشىسى وزىنە تيەسىلى ءتاجدى قورعاپ قالۋ ءۇشىن 24 قارسىلاسىن قاپى قالدىردى. وسىنداي تولاعاي تابىسقا قول جەتكىزگەن فلويد ءبىراۋىزدان ءححى عاسىردىڭ العاشقى جيىرما جىلدىعىنىڭ تەڭدەسسىز بوكسشىسى دەپ تانىلدى. ال كەيبىر باسىلىمدار ونى مۇحاممەد ءالي مەن مايك تايسوننان دا جوعارى قويادى.
بارشا جانكۇيەر ايگىلى بوكسشىنى كوبىنە-كوپ مەيۆەزەر ەمەس, Money دەپ اتايدى. اعىلشىن تىلىنەن اۋدارساق, بۇل – اقشا دەگەن ءسوز. ياعني ول قارجى تابۋدىڭ جولىن جاقسى بىلەدى. 2007 جىلى وسكار دە لا حويامەن جۇدىرىقتاسقانى ءۇشىن فلويدتىڭ ەسەپشوتىنا 136,9 ميلليون اقش دوللارى اۋدارىلدى. 2013 جىلى ساۋل الۆارەسپەن ايقاسىپ, 150 ميلليونعا بايىدى. 2015 جىلى مەنني پاكياومەن كۇش سىناسقانى ءۇشىن 437 ميلليون شاماسىندا ولجاعا كەنەلدى. 2017 جىلى ەرەجەسىز جەكپە-جەكتىڭ حاس شەبەرى كونور ماكگرەگوردى 10-راۋندتا ۇرىپ جىعىپ, 100 ميلليوندى ء«اميانىنا» سالدى. كاسىپقوي بوكس تاريحىندا مەيۆەزەرگە دەيىن ەشكىم وسىنداي كولەمدە مول قاراجاتقا يەلىك ەتىپ كورمەگەن.
سونداي-اق ونىڭ ءوز بيزنەسى بار جانە دە ءتۇرلى برەندتەردى جارنامالاپ, ودان دا كوپ پايدا كورەدى. ماسەلەن, ءوزى قۇرعان Mayweather Boxing + Fitness سپورتتىق دۇكەندەر جەلىسى جىلىنا 100 ميلليون دوللار تابىس اكەلەدى. The Money Team مەن The Best Ever برەندتىك كيىمدەرى ارقىلى 25 ميلليوندى يەمدەنۋدە. لاس-ۆەگاستاعى Girl كلۋبىنىڭ جىلدىق تابىسى 15 ميلليوندى قۇرايدى. مىنە, وسىلاي جالعاسا بەرەدى.
2018 جىلعا دەيىن مەيۆەزەر الەمدەگى ەڭ باي سپورتشىلار تىزىمىندە جەكە-دارا كوش باستاپ كەلدى. ءتىپتى ول اتاقتى فۋتبولشىلار مەن تەننيسشىلەر, گولف شەبەرلەرى مەن باسكەتبولشىلاردىڭ وزدەرىنەن اسىپ ءتۇستى. داۋلەتى تاسىعان داڭقتى بوكسشى ءوزىنىڭ سۇيىكتى ىسىنەن الدەقاشان قول ۇزگەنىمەن, قارجىلىق جاعدايى جاقسارماسا, كەمىگەن ەمەس.