جاراسىن جالاپ جازعان بورىدەي ايعا ارزۋ ايتىپ, ۇرپاعىنىڭ قامىن ويلاپ بىردە تاۋ-تاسقا جان ساۋعالاسا, بىردە اشىق كەلگەن جاۋىنا ايباتتانا قارسى شاپقان قازاقتىڭ قانىنا بىتكەن ءبىر قاسيەت – وسى اڭشىلىق ونەر. سارى سۇيەگىندە سان عاسىر بويى ساقتالىپ كەلگەن دالا ءداستۇرىنىڭ ءدارىسى ۇرپاق بويىنا سىڭگەلى قاشان... قانسوناردىڭ قىزىعى قازاق ءۇشىن بىتپەس اڭگىمە, تاۋسىلماس جىر, كوركەم كارتينا ەمەس پە؟!
«اڭشى مەن قۇس» كارتيناسىنا قاراپ, ءبىر اڭگىمە ەسىمە ءتۇسىپ تۇرعانى. جاڭىلىسپاسام جازۋشى راقىمجان وتارباەۆتىڭ «شىڭعىس حاننىڭ كوز جاسى» اتتى حيكاياتى-اۋ دەيمىن. سوندا ۇلى جورىققا اتتانعان قالىڭ تۇمەن جۇگىرگەن اڭ, ۇشقان قۇستى ازىق ەتىپ, اش وزەگىن جالعايدى. دەسە دە كەزىككەنىن قىناداي قىرۋعا رۇقسات جوق. شىڭعىس حاننىڭ پارمەنى سونداي. جىلت ەتكەن كوكتەمنەن قارا كۇزگە دەيىن قارۋ كوتەرتپەيدى. «اڭ ءتولىن, قۇس بالاپانىن ورگىزەر شاق. تۇقىمى ۇزىلمەسىن, الاڭسىز اياقتانسىن, ءتۇبىتىن ءتۇسىرسىن» دەگەن تىلەك. ال قاراشانىڭ قاتقاعىنان وگىزدىڭ ءوزىن وكىرتكەن اقپاننىڭ اياعىنا دەيىن قالاي اۋلاساڭ دا ەركىڭ. قولىن قاقپايدى. بۇل ءبىز مىسالعا العان شىعارمانىڭ شىندىعى.
باقساڭىز, تانىمال سۋرەتشى الپىسباي قازىعۇلوۆتىڭ «اڭشى مەن قۇس» كارتيناسى ابستراكتسيونيزم جانە سيۋررەاليزم ستيلىندە جازىلعان. ول جابىق قويۋ تۇستەردىڭ جارقىلىنا ادامنىڭ كىشكەنتاي ءپىشىنىڭ قاراما-قايشى قولدانادى. بوياۋ اعىنىمەن جۇزگەن ساڭىلاۋلى اسپاننىڭ تۇنەرۋى دۇنيەگە تونگەن قاسىرەتتەن حابار بەرىپ تۇرعانداي.
كەنەپ بەتىندەگى كومپوزيتسيا ەكى بولىمنەن تۇرادى. ءبىز وڭ جاقتاعى كورىنىستەن قۇس قاناتى مەن ساداعىن تومەن ءتۇسىرىپ, تىك تۇرعان ەر ادامنىڭ سۇلباسىن كورەمىز. كوكجيەككە ەنگەن قىزىلدى-سارىلى كۇن ساۋلەسىنە قاراپ جەردىڭ تەگىس ەكەنىن بايقاۋعا بولادى. سۋرەتشى ەكى بولىكتى ايقۇش-ۇيقىش بويالعان قاۋىرسىندار ارقىلى اجىراتادى. ءبىز ۇشقان قۇستى ەمەس, تەك تۇستەر ارقىلى الەم-جالەم بويالعان كەنەپ بەتىنە قيعاش ورنالاسقان ەكى قاناتتى كورەمىز. ولاردىڭ ىشىندە قىزىل-قارا ءتۇستىسى ۇشۋعا تالپىنعان قۇستىڭ جانايقايىن بەرەدى. كارتينانىڭ بۇل بولىگى جايسىزدىق جانە ازاپتى سەزىم سىيلايدى, قازىر عانا بولعان قاسىرەتتى سەزدىرەدى.
سۋرەتشى ءوز كارتيناسىندا ءتۇس, سىزىق جانە كومپوزيتسيا ارقىلى كوڭىل كۇيدى, جان تەربەلىسىن بەرىپ, قيالداۋ مەن ەلەستەتۋ ءۇشىن كەڭىستىكتى قالدىرادى. ب ۇلىڭعىر كورىنىستەر وقىرماندى ءارتۇرلى ويعا جەتەلەيدى. شىنىندا شەبەردىڭ ويلاعانى دا سول بولاتىن.