ءماجىلىس توراعاسى نۇرلان نىعماتۋلين جاپونيانىڭ قازاقستانداعى ەلشىسى ماساەسي كاموحارامەن كەزدەستى. تاراپتار ەكى ەلدىڭ قارىم-قاتىناسىن تالقىلادى. سونداي-اق, قوس مەملەكەتتىڭ ستراتەگيالىق ارىپتەس جانە ءوزارا تۇسىنىستىك دەڭگەيىندە جولعا قويىلعان جوعارى ىنتىماقتاستىق جاعدايىن ءسوز ەتتى. سونىمەن قاتار, حالىقارالىق قاۋىپسىزدىك, سونىڭ ىشىندە يادرولىق قارۋسىزدانۋ جانە تاراتپاۋ ماسەلەلەرىنە دە باسا نازار اۋداردى.
ءماجىلىس توراعاسى قازاقستان پرەزيدەنتى نۇرسۇلتان نازارباەۆتىڭ وسى سالاداعى باستامالارىنىڭ ماڭىزدىلىعى مەن وزەكتىلىگىنە توقتالدى. ودان ءارى, ول ءبىزدىڭ ەلدەرىمىز يادرولىق قارۋدان جاپا شەككەن ەل رەتىندە جاپپاي قىرىپ- جويۋعا سوقتىراتىن قارۋدى تاراتپاۋ جانە اتومدى بەيبىت ماقساتتا پايدالانۋ جولىنداعى جاۋاپكەرشىلىكتى سەزىنەتىنىن اتاپ كورسەتتى. «سوندىقتان, يادرولىق قارۋدى تاراتپاۋ تۋرالى شارت حالىقارالىق قاۋىپسىزدىك ءۇشىن وتە ماڭىزدى», – دەدى نۇرلان نىعماتۋلين.
وسى رەتتە ءماجىلىس توراعاسى يادرولىق قاۋىپسىزدىككە بايلانىستى گااگادا وتكەن سامميت ەلباسى باستاماسىنىڭ زاماناۋيلىعىنىڭ تاعى ءبىر كورسەتكىشى ەكەنىنە نازار اۋدارتتى. سپيكەردىڭ تاعى ءبىر اتاپ وتكەنى, جاپونيانىڭ جەتەكشى ەنەرگەتيكالىق كومپانيالارىمەن ءوزارا ىقپالداستىعى. سونىڭ ناتيجەسىندە ەلىمىزدىڭ اتوم ونەركاسىبى سالاسىن ۇزدىك تەحنولوگيالارمەن قامتاماسىز ەتۋگە مۇمكىندىك تۋدى.
ءوز كەزەگىندە ماساەسي كاموحارا جاپونيا قازاقستانمەن بارلىق باعىتتا, اسىرەسە, اتومدى بەيبىت ماقساتتا پايدالانۋ ماسەلەسىندە ەتەنە بايلانىس جاساۋعا دايىن ەكەنىن جەتكىزدى. ەلشى قازاقستاننىڭ دامۋىن جوعارى باعالاپ, جاپوندىقتاردىڭ ءبىزدىڭ ەلىمىزگە دەگەن قىزىعۋشىلىعىنىڭ جىل ساناپ ارتىپ وتىرعانىن جەتكىزدى. وسى رەتتە م. كاموحارا پرەزيدەنتتىڭ «قازاقستان-2050» ستراتەگياسى زور مۇمكىندىكتەر اشاتىنىنا سەنىم ءبىلدىردى.
نۇرلان نىعماتۋلين اتالعان ەلدىڭ ەنەرگەتيكا سالاسىنداعى وزىق تاجىريبەسىن ەسكەرە وتىرىپ, جاپوندىق كومپانيالاردى ەكسپو-2017 كورمەسىنە قاتىسۋعا شاقىردى. ال ساۋدا-ەكونوميكالىق بايلانىسقا كەلسەك, قوس تاراپتىڭ دا بۇل باعىتتى ودان ءارى دامىتۋعا قىزىعۋشىلىعى زور. 2013 جىلى تاۋار اينالىمى 1,7 ملرد. اقش دوللارىنان اسقان. قازاقستان ەكونوميكاسىنا تىكەلەي جاپوندىق ينۆەستيتسيا ارقىلى كەلگەن ىشكى جيىنتىق ءتۇسىم مولشەردەگىدەن 6,2 ملرد. اقش دوللارىنا ارتىق.
ودان ءارى پارلامەنتارالىق قارىم-قاتىناستى نىعايتۋ جايىندا اڭگىمە ءوربىدى. كەزدەسۋ يەلەرى وسى جولدا بەيىندى كوميتەتتەر مەن ىنتىماقتاستىق جونىندەگى توپتار اراسىنداعى ءوزارا ءىس-قيمىلدى كەڭەيتۋدىڭ وزەكتىلىگىن اتاپ ءوتتى.