كەلەسى وقۋ جىلىنان باستاپ IT ماماندىقتارىن يگەرۋگە نيەتتەنگەن تالاپكەرلەر ۇبت-دا فيزيكا ەمەس, ينفورماتيكا ءپانىن تاپسىراتىن بولادى. بۇل تۋرالى قر بعم حابارلادى, دەپ جازادى Egemen.kz.
ءبىلىم جانە عىلىم مينيسترلىگىندە اتاپ وتىلگەندەي, IT-باعىتتارى بويىنشا جوو-دا وقىعىسى كەلەتىن تالاپكەرلەر ءۇشىن ۇبت تاپسىرۋ كەزىندە بەيىندى پاندەر تىزبەسىنە «ينفورماتيكا» ءپانىن ەنگىزۋ تۋرالى كوپتەگەن وتىنىشتەر كەلىپ تۇسۋدە.
«وسىعان بايلانىستى مينيسترلىك تالداۋ جۇرگىزىپ, 2022-2023 وقۋ جىلىنان باستاپ «ينفورماتيكا مۇعالىمدەرىن دايارلاۋ», «اقپاراتتىق تەحنولوگيالار» جانە «اقپاراتتىق قاۋىپسىزدىك» ءبىلىم بەرۋ باعدارلامالارى توپتارىنا تۇسەتىن وقۋشىلار ۇبت-دا ماتەماتيكا مەن فيزيكانىڭ ورنىنا ماتەماتيكا مەن ينفورماتيكا كومبيناتسياسىن تاپسىرادى دەپ شەشىم قابىلدادى», دەلىنگەن ۆەدومستۆو حابارلاماسىندا.
بيىلعى وقۋ جىلىندا بەيىندىك ءپان «فيزيكا» بولىپ قالا بەرەدى, بۇل رەتتە تالاپكەرلەردىڭ تاڭداۋى بويىنشا ناۋرىز ايىندا وتەتىن ۇبت كەزىندە دايىندىقتىڭ وسى باعىتتارىنا ءتۇسۋ ءۇشىن «ماتەماتيكا+ينفورماتيكا» كومبيناتسياسىن تاڭداۋ وپتسياسى قوسىمشا قولجەتىمدى بولادى.