17-18 اقپاندا EXPO 2020 Dubai دۇنيەجۇزىلىك كورمەسىندەگى قازاقستان رەسپۋبليكاسىنىڭ ۇلتتىق پاۆيلونىندا «بولاشاق ەنەرگياسى: ايەلدەر, بيزنەس جانە جاھاندىق ەكونوميكا» III حالىقارالىق فورۋمى ءوتتى, دەپ حابارلايدى Egemen.kz.
قازاقستان رەسپۋبليكاسى پرەزيدەنتىنىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ قولداۋىمەن «ەۋرازيالىق ايەلدەر اليانسى» قب ءىس-شارانىڭ ۇيىمداستىرۋشىسى بولدى. I جانە II حالىقارالىق فورۋمدار EXPO 2015 Milan جانە EXPO 2017 Astana كورمەلەرى اياسىندا وتكىزىلدى.
2030 جىلعا دەيىنگى كەزەڭگە ارنالعان تۇراقتى دامۋ سالاسىنداعى جاھاندىق كۇن تارتىبىندە ايەلدەردىڭ جان-جاقتى جانە ءتيىمدى قاتىسۋىن قامتاماسىز ەتۋ قاجەتتىلىگى جانە شەشىمدەر قابىلداۋدىڭ بارلىق دەڭگەيلەرىندە, ونىڭ ىشىندە قوعامدىق ومىردە باسشىلىق جاساۋ ءۇشىن ولاردىڭ تەڭ مۇمكىندىكتەرى ەرەكشە اتاپ ءوتىلدى.
فورۋمنىڭ نەگىزگى يدەياسى ەكونوميكا مەن مادەنيەتتىڭ ءتۇرلى سالالارىنداعى حالىقارالىق گۋمانيتارلىق ىنتىماقتاستىقتى دامىتۋ ءۇشىن قوعامدىق باستامالار مەن ءارتۇرلى ەلدەر ايەلدەرىنىڭ ۇمتىلىستارىن بىرىكتىرۋ بولىپ وتىر.
فورۋمنىڭ پلەنارلىق وتىرىسىندا ەۋرازيالىق ايەلدەر اليانسى باسقارما توراعاسى, ماسكەۋ قالاسىنداعى ەۋرازيا ايەلدەر فورۋمى توراعاسىنىڭ ورىنباسارى رايحان باكىروۆا, قازاقستان رەسپۋبليكاسىنىڭ بىرىككەن اراب امىرلىكتەرىندەگى باس كونسۋلى راۋان جۇمابەك, قازاقستان رەسپۋبليكاسى پرەزيدەنتىنىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ ءتورايىمى ءلاززات رامازانوۆا, يتاليا ۇلتتىق پاۆيلونىنىڭ ديرەكتورى يزابەللا كولاندجەلو جانە باسقالار ءسوز سويلەدى.
فورۋمدا «الەۋمەتتىك وزگەرىستەر مەن ءومىر ساپاسىن ارتتىرۋ ماقساتىندا ايەلدەر كوشباسشىلىعىن ناسيحاتتاۋ» جانە «قازىرگى زاماننىڭ جاھاندىق سىن-تەگەۋرىندەرى جاعدايىندا ەتنومادەني قۇندىلىقتاردى ساقتاۋ: تسيفرلاندىرۋ جانە ۆيرتۋالدى عالام» اتتى ەكى تاقىرىپتىق سەسسيا ءوتتى. سەسسيا شەڭبەرىندە ايەلدىڭ عىلىمداعى, الەۋمەتتىك وزگەرىستەردەگى, مەديتسيناداعى جانە جاسىل تەحنولوگيالارداعى ءرولى تالقىلاندى.
فورۋم سوڭىندا پاۆيلون الدىنداعى اۋماقتا «سارىارقا – ۇلى دالا ايەلدەرى» پورترەتىن سالعان سۋرەتشى-پاسسيوناري, قازاقستان سۋرەتشىلەر وداعىنىڭ مۇشەسى, حالىقارالىق بايقاۋلاردىڭ لاۋرەاتى جانە كينەس پەن گيننەستىڭ رەكوردشىسى رەنات ەلۋباەۆتىڭ قاتىسۋىمەن شوۋ ءوتتى.