2022 جىلى ەلىمىزدە ستۋدەنتتەر ءۇشىن 11 مىڭ ورىندىق 32 جاتاقحانا پايدالانۋعا بەرىلەدى. بۇل تۋرالى قر ءبىلىم جانە عىلىم مينيسترلىگى «قارجى ورتالىعى» اق باسقارما توراعاسى اسقار يبرايموۆ ءمالىم ەتتى, دەپ حابارلايدى Egemen.kz.
«جاتاقحانا سالۋدا قۇرىلىس جانە ودان ءارى پايدالانۋ قولدانىستاعى قۇرىلىس, ورتكە قارسى جانە سانيتارلىق-ەپيدەميولوگيالىق نورمالارعا قاتاڭ سايكەس جۇزەگە اسىرىلۋى كەرەك. بۇگىنگى تاڭدا ارالىق ناتيجەلەرى بار - 30 630 ورىندىق 124 جاتاقحانا پايدالانۋعا بەرىلدى.
سونداي-اق الدىن الا جاسالعان شارتتار, جەرگىلىكتى بيۋدجەت قاراجاتىنان نىسانالى قۇرىلىس, مەنشىكتى قاراجات جانە دەمەۋشىلىك قاراجات ەسەبىنەن 2022 جىلى 11 مىڭ ورىندىق 32 جاتاقحانانى پايدالانۋعا بەرۋ جوسپارلانىپ وتىر», دەدى ا. يبرايموۆ ورتالىق كوممۋنيكاتسيالار قىزمەتىندە.