نۇر-سۇلتان قالاسىنىڭ اكىمى التاي كولگىنوۆ Instagram پاراقشاسىندا قۇرىلىسى ءجۇرىپ جاتقان كوپىرلەر جايلى ءمالىم ەتتى, دەپ حابارلايدى Egemen.kz.
«قالا حالقى سانىنىڭ جىل سايىنعى وسۋىنە بايلانىستى جول ينفراقۇرىلىمىنا تۇسەتىن كۇش تە ارتىپ كەلەدى. جول جەلىسىنە تۇسەتىن جۇكتەمەنى ازايتۋ ءۇشىن قالا ىشىندە, ەلدى مەكەندەردە جاڭا جول سالامىز, سول سياقتى ەسكىرگەن تۇستارىن جوندەيمىز. كوپىرلەر مەن كولىك قيىلىستارىنا ەرەكشە كوڭىل بولىنەدى.
قازىر ەلوردادا ەكى كوپىردىڭ قۇرىلىسى ءجۇرىپ جاتىر. قالانى ارالاۋ بارىسىندا ەسىل وزەنى ارقىلى وتەتىن تاۋەلسىزدىك داڭعىلى بويىنداعى كوپىر قۇرىلىسىمەن تانىستىم. كوپىرگە قاتىستى سوت پروتسەستەرى بولعاندىقتان قۇرىلىسى ۇزاققا سوزىلعان نىسانعا اينالىپ كەتە جازدادى. بىراق پروبلەمالارى شەشىلىپ, كۇزدە كوپىر قۇرىلىسى قايتا باستالدى», دەپ جازدى ەلوردا اكىمى.
ونىڭ ايتۋىنشا بۇل كوپىر تاۋەلسىزدىك داڭعىلى, جاڭا تەمىرجول ۆوكزالى اۋدانى, ازىرەت سۇلتان مەشىتى اۋدانى, ناجىمەدەنوۆ كوشەسى, قوشقارباەۆ داڭعىلى, بايتۇرسىنوۆ كوشەسى, قورداي كوشەسى, ايناكول كوشەسى, مومىش ۇلى داڭعىلىنىڭ سول جاعالاۋمەن جانە ت.ب. قوسىمشا بايلانىستى قامتاماسىز ەتۋگە مۇمكىندىك بەرمەك. اتالعان كوپىردىڭ قۇرىلىسىن كەلەسى جىلى اياقتاۋ جوسپارلانىپ وتىر.
« ۇلى دالا داڭعىلىندا دا كوپىر قۇرىلىسى ءجۇرىپ جاتىر. وڭ جانە سول جاعالاۋدى جالعايتىن كوپىر ماڭگىلىك ەل داڭعىلى, ناجىمەدەنوۆ, بايتۇرسىنوۆ, قوشقارباەۆ كوشەلەرىنە, Nova city اۋدانىنا, «مىڭجىلدىق» اللەياسىنا تۇسەتىن كۇشتى ازايتادى. تەمىرجول ۆوكزالىنىڭ, تەلمان, پرومىشلەننىي ەلدى مەكەندەرىنىڭ, مەترو گيپەرماركەتى اۋدانىنىڭ, جۇماباەۆ داڭعىلى, جۇرگەنوۆ كوشەسىنىڭ جانە ت.ب. قولجەتىمدىلىگى ارتادى.
سوڭعى ەكى جىلدا 300 كوشە سالىندى جانە جوندەلدى, ولاردىڭ جارتىسىنان كوبى – ەلدى مەكەندەردە, سول سياقتى جاڭا اۆتوبۋس باعىتتارى ىسكە قوسىلدى. سونىمەن قاتار, اۆتوبۋس پاركىن جاڭارتامىز. بيىل جەلىگە تاعى دا 100-دەن استام ەلەكتر اۆتوبۋسىن ىسكە قوسۋدى جوسپارلاپ وتىرمىز», دەپ جازدى ەلوردا اكىمى.