ەل استاناسىندا «2021 جىلى مادەنيەت جانە ارحيۆ ءىسى سالاسىنداعى قىزمەت تۋرالى. 2022 جىلعا ارنالعان نەگىزگى مىندەتتەر» تاقىرىبىندا مادەنيەت جانە سپورت مينيسترلىگىنىڭ كەڭەيتىلگەن القا وتىرىسى ءوتتى. القالى جيىنعا پرەزيدەنت اكىمشىلىگى, پارلامەنت پەن ۇكىمەت وكىلدەرى, قوعامدىق كەڭەس مۇشەلەرى, مادەنيەت جانە ارحيۆتەر سالاسىنداعى وبلىستىق باسقارمالاردىڭ باسشىلارى, مادەنيەت جانە ارحيۆ سالاسىنداعى ۆەدومستۆولىق باعىنىستى ۇيىمداردىڭ باسشىلارى قاتىستى.
ۆەدومستۆونىڭ مادەنيەت, ارحيۆ ءىسى جانە باسپا ماسەلەلەرىنە ارنالعان القا وتىرىسىندا مادەنيەت جانە سپورت ءمينيسترى داۋرەن اباەۆ ەڭ الدىمەن سالاداعى بىلتىر اتقارىلعان جۇمىستارعا توقتالدى. سونداي-اق بيىلعى جوسپارلار مەن مىندەتتەردى دە اتاپ وتكەن مينيستر حالىقتىڭ مادەني سۇرانىسىن تولىقتاي قامتاماسىز ەتۋ ءۇشىن تاعى 300-دەن استام نىسان اشۋ قاجەت ەكەنىن ايتتى.
«بۇگىندە ەلىمىزدە 7 637 مادەنيەت نىسانى جۇمىس ىستەپ تۇر. تاعى دا 300-دەن استام مەكەمەگە سۇرانىس بار. مۇنداي قاجەتتىلىك, نەگىزىنەن, اۋىلدىق جەرلەردە. دەيتۇرعانمەن, سالادا جۇمىس ىستەيتىن ۇكىمەتتىك ەمەس ۇيىمدار مۇنداي مەكەمەلەردىڭ كوپشىلىگى تۇرعىنداردىڭ تالاپ-تىلەگىن ەسكەرمەي سالىناتىنىن ايتادى. سونىڭ سالدارىنان سالىنعان مەكەمە قاڭىراپ بوس تۇرادى. سول ءۇشىن جوسپارلاعان كەزدە تۇرعىندار پىكىرىن ەسكەرۋ وتە ماڭىزدى. كەيبىر رەسپۋبليكالىق مادەنيەت ۇيىمدارى عيماراتتارىنىڭ تەحنيكالىق جاعدايى تومەن. وعان ءوزىم كۋا بولدىم», دەگەن مينيستر وسى رەتتە م.اۋەزوۆ اتىنداعى قازاق ۇلتتىق دراما تەاترى, ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ باس كورپۋسى, جامبىل اتىنداعى قازاق مەملەكەتتىك فيلارمونياسى مەن رەسپۋبليكالىق اكادەميالىق نەمىس دراما تەاترى جوندەۋ جۇمىستارىن قاجەت ەتەتىنىن اتاپ ءوتتى. وسىعان وراي سالاعا جەتەكشىلىك ەتەتىن ۆيتسە-مينيسترگە 35 مادەنيەت نىسانىنىڭ قۇرىلىسىن جانە 265 نىساننىڭ جوندەلۋىن باقىلاۋعا الۋدى تاپسىردى.
«قازىرگى ۋاقىتتا 229 مەملەكەتتىك ارحيۆ جۇمىس ىستەيدى. وسى رەتتە ارناۋلى تيپتەگى مەملەكەتتىك ارحيۆتەر عيماراتىنا دەگەن سۇرانىس وتە جوعارى. ونداي ارحيۆتەردىڭ ۇلەسى بۇگىندە 14,7 پايىز. ساراپتاما جۇمىستارى رەسپۋبليكا بويىنشا 128 نىسان سالۋ قاجەت ەكەنىن كورسەتىپ وتىر. وعان قوسا «ە-ارحيۆ» جۇيەسىنىڭ نەگىزگى سەرۆەرى ىستەن شىققان جاعدايدا جۇيەنى رەزەرۆتىك سەرۆەرلەرمەن قامتاماسىز ەتۋ ماسەلەسىن باقىلاۋعا الۋ كەرەك. سونداي-اق ارحيۆ ءىسىنىڭ بىلىكتى ماماندارىن دايارلاۋ ماسەلەسى ايرىقشا نازار اۋدارۋدى قاجەت ەتەدى. 2022 جىلعى 1 قاڭتارداعى دەرەك بويىنشا ارحيۆ مەكەمەلەرىنىڭ شتاتى 3 340 بىرلىكتى قۇرادى. ونىڭ 8 پايىزىنىڭ عانا بەيىندى جوعارى ءبىلىمى بار», دەدى د.اباەۆ.
بۇدان بولەك مينيستر جۇرگىزىلگەن ساراپتاما قورىتىندىسى 2022-2026 جىلدارى 1 700-دەن اسا مامان قاجەت ەكەنىن كورسەتىپ وتىرعانىن ايتتى. سونداي-اق ول مادەنيەت سالاسىنداعى قىزمەتكەرلەردىڭ الەۋمەتتىك قامتىلۋىن جاقسارتۋعا ۋادە بەردى.
«ارينە, سالاداعى ەڭ وزەكتى ماسەلەلەردىڭ ءبىرى – مادەنيەت ۇيىمدارى قىزمەتكەرلەرىنىڭ الەۋمەتتىك پاكەتى. «ۇلتتىق» مارتەبەسى بار مادەنيەت ۇيىمدارىنىڭ لاۋازىمدىق جالاقىلارىنا 1,75 كوەففيتسيەنتى تۇرىندە قوسىمشا اقىلار مەن ۇستەمەاقىلار ازىرلەۋ قاجەت», دەدى داۋرەن اباەۆ ۆەدومستۆونىڭ كەڭەيتىلگەن القا وتىرىسىندا. ءمينيستردىڭ ايتۋىنشا, شىعارماشىلىق جوعارى وقۋ ورىندارىنىڭ پروفەسسور-وقىتۋشىلار قۇرامى مەن كونتسەرتمەيسترلەرىنىڭ جالاقى مولشەرىنە دە نازار اۋدارۋ قاجەت.
شىعارماشىلىق ۋنيۆەرسيتەتتەرگە ورتاق ماسەلەلەردى بايانداعان قۇرمانعازى اتىنداعى قازاق ۇلتتىق كونسەرۆاتورياسىنىڭ رەكتورى ارمان جۇدەباەۆ ءبىلىم بەرۋ سالاسىنداعى زاڭداردىڭ كەيبىر نورمالارى شىعارماشىلىق جوعارى وقۋ ورىندارىنىڭ ەرەكشەلىكتەرىنە ساي كەلمەيتىنىن ايتتى.
«سكريپكاشىلاردان, كومپوزيتورلاردان, انشىلەردەن, ءداستۇرلى مۋزىكا ماماندارىنان, بالەت ارتىستەرىنەن, قولدانبالى سۋرەتشىلەردەن, اكتەرلەردەن جانە باسقا دا شىعارماشىلىق كاسىپ وكىلدەرىنەن عىلىمي دارەجە مەن يمپاكت-فاكتورى جوعارى ماقالالاردى تالاپ ەتۋ قيسىنسىز. ودان بولەك ماتەريالدىق-تەحنيكالىق بازانىڭ جەتكىلىكسىز ەكەنى دە راس. مۋزىكالىق اسپاپتار ەسكىرگەن, شىعارماشىلىق شەبەرحانالارعا, وقۋ تەاترلارىنا, ستۋدەنتتىك وركەسترلەر مەن حورلارعا, كونتسەرتتىك كوستيۋمدەرگە ارنالعان ارنايى جابدىقتار دا تاپشى», دەيدى رەكتور.
ال شاكەن ايمانوۆ اتىنداعى «قازاقفيلم» اق پرەزيدەنتى اقان ساتاەۆ كينوستۋديانىڭ قازىرگى جاي-كۇيىنە توقتالىپ, تاپقان بارلىق قاراجات جالاقىعا جۇمسالىپ جاتقانىن ايتتى.
«بۇگىنگى تاڭدا زاماناۋي جاڭا تەحنيكالاردى الىپ جاتىرمىز. باسقارۋ قۇرىلىمىن وزگەرتتىك, اشىقتىقتى ارتتىردىق, قاۋىپسىزدىك قىزمەتىن قۇردىق, ۇكىمەتتىڭ قولداۋىمەن گاز جۇرگىزدىك, جالعا بەرۋ تابىسىن پاندەمياعا دەيىنگى كەزەڭمەن سالىستىرعاندا 400%-عا دەيىن كوتەردىك. ءبىز بارىنشا جۇمىس ىستەپ جاتىرمىز. الايدا ستۋديا تاپقان بارلىق قاراجات قىزمەتكەرلەردىڭ جالاقىسى مەن اكىمشىلىك-شارۋاشىلىق قاجەتتىلىكتەرىنە جۇمسالادى. شىنىن ايتقاندا, ءوز فيلمدەرىمىزدى شىعارۋعا دا قاراجات جەتكىلىكسىز», دەدى رەجيسسەر.
كەڭەيتىلگەن القا وتىرىسىندا بايانداما جاساعان «بوزوق» تاريحي-مادەني مۋزەي-قورىعىنىڭ باسشىسى ساۋلە بورىباەۆا ەل استاناسىندا مۋزەي اشۋ پەرسپەكتيۆالارى تۋرالى ايتتى.
«2020 جىلى مۋزەي-قورىقتىڭ قىزمەتىن جەتىلدىرۋگە مۇمكىندىك بەرەتىن 24 نورماتيۆتىك-قۇقىقتىق اكت قابىلداندى. «بوزوق» قالاشىعى ۇلتتىق پاركىنىڭ جوباسى ۇلگىسىندە رەبرەندينگتىڭ الەۋەتى بۇل سالادا زور ەكەنىن كورسەتكىمىز كەلەدى. جوبا ەۋرازيالىق دالا وركەنيەتىنىڭ الۋان تۇرلىلىگى مەن بايلىعىن كورسەتۋدى ماقسات ەتەدى», دەگەن مۋزەي-قورىق باسشىسى بوزوق قالاشىعى مىڭجىلدىق تاريحتىڭ كوزى ەكەنىن ەسكە سالدى.
«تاريحي نىسانمەن بايلانىستى بۇل جوبانىڭ ينۆەستيتسيالىق الەۋەتى زور. ەنەوليت داۋىرىنەن باستاپ قازىرگى زامانعا دەيىنگى دالا وركەنيەتىنىڭ, مادەنيەتى مەن ەتنوگرافياسىنىڭ سان ءتۇرلى قاتپارىن بويىنا سىڭىرگەن عيباداتحانالار مەن مادەني قۇرىلىمدار بار. مەتاللۋرگيا جانە قىش ءوندىرىسىنىڭ ەجەلگى تەحنولوگيالىق كەشەندەرى دە بار. سولاردى قالپىنا كەلتىرۋ ءۇشىن 4 عىلىمي تۇجىرىمداما جاسالدى. جوبانىڭ ينۆەستيتسيالىق باعىتى بويىنشا امفيتەاتر اشۋ كوزدەلگەن. شىعىس بازارىنىڭ ايلاعى, وتباسىلىق دەمالىس ورتالىعى, بيوپارك سالۋ ۇسىنىلادى», دەدى س.بورىباەۆا.
ەلىمىزدە باسپا ءىسى سالاسىندا ناقتى ءبىر جۇيە جوق ەكەنىن ايتىپ ءجۇرمىز. كەڭەيتىلگەن القا وتىرىسىندا وسى ماسەلەنى ۇلتتىق كىتاپ پالاتاسىنىڭ ديرەكتورى ءادىل قويتانوۆ كوتەردى. ونىڭ ايتۋىنشا, 2022 جىلعا ارنالعان «جىلدىڭ ۇزدىك كىتابى», «ۇزدىك جاس قالامگەر», «بالالارعا ارنالعان ۇزدىك شىعارما» بايقاۋلارىن وتكىزۋگە قوسىمشا بيۋدجەتتىك ءوتىنىمدى ناقتىلاۋ كۇتىلۋدە.