دۇنيەجۇزىلىك دەنساۋلىق ساقتاۋ ۇيىمى الداعى اپتالاردا كوروناۆيرۋستىق ينفەكتسيانىڭ پايدا بولۋىن زەرتتەۋ ناتيجەلەرىن جاريالايدى, دەپ حابارلايدى Egemen.kz.
بۇل تۋرالى ددۇ ەۋروپالىق ايماقتىق بيۋروسىنىڭ ديرەكتورى حانس كلۋگە مالىمدەدى.
«وتكەن جىلدىڭ قازان ايىندا ددۇ جاڭا قوزدىرعىشتاردىڭ پايدا بولۋى تۋرالى عىلىمي-كونسۋلتاتيۆتىك توپ قۇردى. الداعى اپتالاردا اتالعان توپ تاراپىنان كەيبىر ناتيجەلەر مەن ۇسىنىستاردى كۇتەمىز», دەدى حانس كلۋگە.
ۇيىمنىڭ ەۋروپالىق فيليالىنىڭ باسشىسى اتاپ وتكەندەي, ددۇ ساراپشىلار توبى كوروناۆيرۋستىڭ جانە ونىڭ جاڭا قوزدىرعىشتارىنىڭ پايدا بولۋىن انىقتايتىن ارنايى جۇيە بويىنشا جۇمىس ىستەيدى.
2021 جىلدىڭ قىركۇيەگىندە ددۇ كوروناۆيرۋستىڭ شىعۋ تەگى تۋرالى زەرتتەۋدى قايتا باستايتىنى بەلگىلى بولدى.
جەلتوقسان ايىندا دۇنيەجۇزىلىك دەنساۋلىق ساقتاۋ ۇيىمىنىڭ دەنساۋلىق ساقتاۋ سالاسىنداعى توتەنشە جاعدايلار جونىندەگى باعدارلاماسىنىڭ ديرەكتورى مايكل رايان ددۇ COVID-19 قايدان شىققانى ءالى بەلگىسىز ەكەنىن ايتتى.