قر ەكولوگيا, گەولوگيا جانە تابيعي رەسۋرستار ءمينيسترى سەرىكقالي برەكەشەۆ كولىكتەن كادەگە جاراتۋ الىمى بويىنشا مولشەرلەمەلەر قاشان انىقتالاتىنىن ايتتى, دەپ حابارلايدى Egemen.kz.
«قازىرگى ۋاقىتتا كابەل-وتكىزگىش ونىمىنە كادەگە جاراتۋ الىمىن الۋدى 2023 جىلعى 1 قاڭتارعا دەيىن توقتاتا تۇرۋ تۋرالى شەشىم قابىلداندى. يندۋستريا جانە ينفراقۇرىلىمدىق دامۋ مينيسترلىگىمەن بىرلەسىپ مولشەرلەمەلەردى قايتا قاراۋ بويىنشا جۇمىستى اعىمداعى ايدىڭ سوڭىنا دەيىن اياقتايمىز», دەدى مينيستر.
ۆەدومستۆو باسشىسى كادەگە جاراتۋ الىمىن اكىمشىلەندىرۋ جانە ءتيىستى قاراجاتقا يەلىك ەتۋ فۋنكتسيالارى «جاسىل دامۋ» اق-عا بەرىلگەنىن ەسكە سالدى.
«جاسىل دامۋ» - تاۋار قالدىقتارىن كەشەندى باسقارۋدىڭ بىرىڭعاي جۇيەسىن قۇرۋعا جانە سول قالدىقتاردى قايتالاما شيكىزات رەتىندە اينالىمعا تارتۋعا, قوقىس وڭدەۋ سالاسىنىڭ ينفراقۇرىلىمدىق دامۋىمەن اينالىساتىن ۇيىم.
ايتا كەتسەك, 8 اقپاندا ۇكىمەتتىڭ كەڭەيتىلگەن وتىرىسىندا پرەمەر-مينيستر ءاليحان سمايىلوۆ اۆتوكولىك پەن اۋىل شارۋاشىلىعى تەحنيكاسىنان كادەگە جاراتۋ الىمىنىڭ مولشەرلەمەسى ايتارلىقتاي تومەندەيتىنىن حابارلادى.