كەشە, 24 ناۋرىز كۇنى كەشكە ۋفادا جەرگىلىكتى «سالاۆات يۋلاەۆ» قۇرلىقتىق حوككەي ليگاسىنىڭ شيرەك فينالىندا استانانىڭ «بارىسىن» قابىلداپ, 5:2 ەتىپ ۇتتى. ءسويتىپ, استاناداعى سوڭعى ويىننىڭ ەسەبى قايتالاندى. مۇندا دا الاڭ يەلەرى باسىم ءتۇستى. بۇل تۋرالى Vesti.kz حابارلادى.
ەكى قارسىلاستىڭ ءۇشىنشى كەزدەسۋىندە ەسەپتى الاڭ يەلەرى اشتى. شايبانى فورۆارد ەگور دۋبروۆسكي ءتۇسىردى. 14-مينۋتتا استانالىق رومان ساۆچەنكو الاڭنان قۋىلدى. وسىنى جاقسى پايدالانعان ۋفالىق اندرەي زۋبارەۆ ەسەپتى 2:0-گە جەتكىزدى.
ەكىنشى كەزەڭنىڭ 5-مينۋتىندا يگور ميرنوۆ قوناقتار قاقپاسىنا ءۇشىنشى شايبانى سۇڭگىتتى. وسىدان كەيىن استانالىقتار ءبىراز جيناقتالدى. ولار كەزەڭ سوڭىنا دەيىن ەكى شايبانىڭ قارىمتاسىن قايتارىپ ۇلگەردى. الدىمەن دميتري ۋپپەن ۇزدىك شىقسا, سوسىن برەندون بوچينسكي كوزگە ءتۇستى.
دەگەنمە, «سالاۆات يۋلاەۆ» بۇعان دەيىنگى باسىمدىعىن ءۇشىنشى كەزەڭدە قايتارىپ الدى. ولار 49-مينۋتتا (تەەمۋ حارتيكاينەن) تاعى ءبىر شايبا سوقتى – 4:2. وسى ەسەپ ماتچ سوڭىنا دەيىن باردى. ال ويىن بىتۋگە ءبىر جارىم مينۋت قالعاندا, استانالىقتار قاقپاشى ۆيتالي ەرەمەەۆتىڭ ورنىنا التىنشى الاڭ ويىنشىسىن شىعاردى. سول كەزدە ۋفالىقتار بوس قاقپاعا تاعى ءبىر شايبا سالۋعا قول جەتكىزدى.
وسىلايشا ءتورت جەڭىسكە دەيىن سوزىلاتىن سەريانىڭ ءۇش ماتچتان كەيىنگى ەسەبى 2:1 بولدى. ازىرگە باشقۇرت حوككەيشىلەرى الدا. كەلەسى كەزدەسۋ 25 ناۋرىزدا تاعى ۋفادا وتەدى. سودان كەيىنگى ماتچتىڭ كەزەگى قايتادان استاناعا كەلەدى.
دامير قوجامقۇل.
دەرەككوز: vesti.kz
فوتو: hcsalavat.ru.