Kaspersky ساراپشىلارى MQTT حاتتاماسىنداعى وسالدىقتاردى تالدادى. بۇل كوبىنەسە پاتسيەنتتەردى قاشىقتان باقىلاۋ ءۇشىن قۇرىلعىلاردان دەرەكتەردى بەرۋدە قولدانىلادى. 2021 جىلى 33 ولقىلىق تابىلدى, ونىڭ 18-ءى وتە ماڭىزدى. بۇل 2020 جىلعا قاراعاندا 10 دەرەككە كوپ جانە ونىڭ كوپشىلىگى ءۇشىن ءالى دە پاتچتەر جوق. تابىلعان كەيبىر كەمشىلىكتەر قۇرىلعىدان ينتەرنەت ارقىلى جىبەرىلگەن دەرەكتەردى الۋعا مۇمكىندىك بەرەدى. تەلەمەديتسينانىڭ قارقىندى دامۋىن ەسكەرسەك, بۇل پروبلەما وتكىر بولۋى مۇمكىن.
MQTT-تاسۋشى قۇرىلعىلار مەن بەرگىشتەردەن دەرەكتەردى بەرۋ ءۇشىن ەڭ كەڭىنەن تارالعان حاتتاما. بۇل تەك مەديتسينالىق عانا ەمەس, سونىمەن قاتار بارلىق اقىلدى گادجەتتەردە دە قولدانىلادى. MQTT-دا سايكەستەندىرۋ مىندەتتى ەمەس جانە شيفرلاۋدى سيرەك قامتيدى, سوندىقتان حاتتاما «ادام ورتادا» سياقتى شابۋىلدارعا ۇشىرايدى. ولاردىڭ ءمانى – شابۋىلداۋشى جابىرلەنۋشىنىڭ ۆەب-ترافيگىن ء«وزى ارقىلى», جابىرلەنۋشى بىلمەيتىن ارنايى ارالىق ءتۇيىن ارقىلى «وتكىزەدى». وسىلايشا, ينتەرنەت ارقىلى بەرىلەتىن كەز كەلگەن دەرەكتەردى, سونىڭ ىشىندە قۇپيا مەديتسينالىق, جەكە, ءتىپتى ادامنىڭ قوزعالىسى تۋرالى اقپاراتتى الۋعا بولادى.
«پاندەميا ءىشىنارا الەمدەگى تەلەمەديتسينا نارىعىنىڭ كاتاليزاتورىنا اينالدى. ويتكەنى شەكتەۋلەر جاعدايىندا ادامدار مەديتسينالىق كومەكتى ەڭ قۇرىعاندا قاشىقتان الۋعا مۇمكىندىك ىزدەدى. بىراق تەلەمەديتسينا – دارىگەرلەردىڭ قاشىقتان كەڭەس بەرۋى عانا ەمەس, سونىمەن قاتار تاسۋشى قۇرىلعىلار مەن جاعدايدى باقىلاۋعا ارنالعان بەرگىشتەر سياقتى ەلەمەنتتەر. بۇل تەحنولوگيالار, ارينە, پروگرەسسيۆتى, بىراق ولاردى قولدانۋ اقپاراتتىق قاۋىپسىزدىك تاۋەكەلدەرىمەن بايلانىستى. مۇنداي گادجەتتەردى قولدانباس بۇرىن كومپانيا مەن پاتسيەنتتەر دەرەكتەرىنىڭ ۇرلانۋىنا نەمەسە قولدى بولۋىنا جول بەرمەۋ ءۇشىن ولاردىڭ قاۋىپسىزدىك دەڭگەيى تۋرالى مۇمكىندىگىنشە كوبىرەك ءبىلۋ كەرەك», دەيدى Kaspersky ورتالىق ازياداعى كوممەرتسيالىق ديرەكتورى ۆالەري زۋبانوۆ.
2014 جىلدان باستاپ MQTT حاتتاماسىندا 90 وسالدىق, سونىڭ ىشىندە سىني وسالدىقتار انىقتالدى. ولاردىڭ كوپشىلىگى ءۇشىن ءالى دە پاتچتەر جوق.
ناۋقاستاردىڭ دەرەكتەرىن قاۋىپسىز ساقتاۋ ءۇشىن Kaspersky تەلەمەديتسينا قىزمەتتەرىنىڭ ءونىم بەرۋشىلەرىنە مەديتسينالىق مەكەمە ۇسىناتىن قوسىمشانىڭ نەمەسە قۇرىلعىنىڭ قاۋىپسىزدىك دەڭگەيىن تەكسەرۋدى, تەلەمەديتسينا ءۇشىن قوسىمشالارمەن بەرىلەتىن دەرەكتەر كولەمىن مۇمكىندىگىنشە بارىنشا ازايتۋدى, قالىبى بويىنشا ورناتىلعان قۇپيا سوزدەردى وزگەرتۋدى جانە مۇمكىن بولسا شيفرلاۋدى قولدانۋدى ۇسىنادى.