ەل بولاشاعى – بالالاردىڭ ءبىلىمدى بولىپ ءوسۋى ەرتەڭگى كۇننىڭ بەرىك كەپىلى. سوڭعى ۋاقىتتا بالالاردىڭ جان-جاقتى دامۋىنا جاقسى مۇمكىندىكتەر تۋىپ وتىر. بۇل ورايدا ەل پرەزيدەنتىنىڭ ماڭىزدى سوزىنەن كەيىن سونى سەرپىن العان تاربيە وشاقتارى ءتالىمدى جۇمىس ىستەۋدە.
ەل ەرتەڭىن قاۋزاعان ءبىر سوزىندە مەملەكەت باسشىسى قاسىم-جومارت توقاەۆ بالالارعا قاتىستى ويىن بىلاي تۇيىندەگەن بولاتىن. «بالالار – مەملەكەتىمىزدىڭ جارقىن بولاشاعىنىڭ كەپىلى. سوندىقتان دا الداعى جىلدى «بالالار جىلى» دەپ جاريالاۋ كەرەك دەپ ەسەپتەيمىن. اڭگىمە جالاڭ ۇران مەن مەرەكەلىك شارالار تۋرالى ەمەس. ءبىرىنشى كەزەكتە بيلىك تاراپىنان بالالاردى قورعاۋ ءۇشىن دەنساۋلىق ساقتاۋ, ءبىلىم بەرۋ, الەۋمەتتىك قولداۋ باعىتىندا ناقتى شارالار قولعا الىنۋى كەرەك. وسكەلەڭ ۇرپاقتىڭ ۇيلەسىمدى دامۋى مەن باقىتتى بالالىق شاعى – ءبىزدىڭ جالپىۇلتتىق مىندەتىمىز».
وبلىس ورتالىعىندا 2020 جىلدىڭ قاراشا ايىندا وبلىستىق ءبىلىم باسقارماسى جانىنداعى Bolashaq Saraiy اشىلعان بولاتىن. قوسىمشا ءبىلىم بەرۋ ورداسىنىڭ قابىرعاسى قالانىپ, ءىشى ءبىلىم شۇعىلاسىمەن نۇرلانعالى نەبارى ءبىر جىلدان استام ۋاقىت وتسە دە, تامىرى تەرەڭگە تارتاتىن تاريحتىڭ العاشقى نەگىزى قالانىپ ۇلگەردى. بۇل ورايداعى ماقسات بەلگىلى. ەڭ الدىمەن سانالى, ءبىلىمدى ۇرپاق تاربيەلەۋ. سول ارقىلى ەلىمىزدىڭ بەدەلىن اسقاقتاتاتىن ۇلاعاتتى ۇلتتىڭ نەگىزىن قالىپتاستىرۋ. Bolashaq Saraiy»-ىندا مەكتەپ وقۋشىلارى مەن ستۋدەنتتەر سپورت, شىعارماشىلىق, ءىت, مەديا جاستار مەن جاسوسپىرىمدەردى ۇيلەستىرۋ باعىتتارى بويىنشا ءوز بىلىمدەرىن جەتىلدىرۋگە تولىق مۇمكىندىك الىپ وتىر.
وسى ءبىلىم ورداسىنىڭ مۇمكىندىگىن ايتا كەتەلىك. ءبىر ۋاقىتتا 1 175 ءبىلىم الۋشى ءوزى قالاعان باعىت بويىنشا شۇعىلدانا الادى. «ا» بلوگى وقۋشىلاردىڭ شىعارماشىلىقپەن, عىلىممەن اينالىسۋىنا ارنالسا, «ب» بلوگى سالاماتتى ءومىر سالتىن ۇستانىپ, سپورتتىڭ الدەنەشە تۇرىمەن اينالىسادى. قازىرگى تاڭدا اتالعان ءبىلىم ورداسىندا 112 ۇيىرمە بار. وسى ۇيىرمەلەردە 3 مىڭنان استام وقۋشى ءبىلىمىن ارتتىرىپ, سپورتپەن شۇعىلدانۋدا. ءبىر ايتا كەتەرلىگى, ءار توپتاعى بالالاردىڭ سانى شەكتەۋلى. نەبارى 15 بالاعا دەيىن. بۇل ولاردىڭ ەركىن شۇعىلدانۋىنا مۇمكىندىك تۋدىرادى.
قازاقستان رەسپۋبليكاسىنىڭ پرەزيدەنتى قاسىم-جومارات توقاەۆ قازىرگى ۋاقىتتا تەحنيكالىق باعىتتاعى ماماندىقتاردىڭ ارتىقشىلىعىنا ايرىقشا ءمان بەرىپ وتىر. ويتكەنى, ەل بولاشاعى تىكەلەي وسى باعىتقا بايلانىستى. بالالاردىڭ تەحنيكالىق ءبىلىم الۋىنا بار مۇمكىندىك قاراستىرىلعان. ايتالىق, ءىت باعىتىندا 30 ۇيىرمە جۇمىس ىستەيدى. تالداپ ايتاتىن بولساق, ينجەنەرلىك باعىت بويىنشا «اۆيامودەلدەۋ» ستۋدياسى, STEAM, Tesla Club, Cybertron روبوتتەحنيكا شەبەرحاناسى, راديوتەحنيكتەر كلۋبى, New Generation ەنەرگەتيكتەر كلۋبى, New Generation ەلەكترونشىلار كلۋبى, اقىلدى زاتتار الەمى, WeDo Club, Lego Club, Lego Mindstorms, Lego WeDo سياقتى 12 ۇيىرمە بار. ال تەحنيكالىق باعىتتاعى كىشكەنتايلارعا ارنالعان الگوريتم, ۇلكەندەرگە ارنالعان الگوريتم, Python, JavaScript, IT كلۋب (ۆەب نەگىزدەر), «3D مودەلدەۋ» شەبەرحاناسى, كومپيۋتەرلىك ديزاين, گرافيكالىق ديزاين ءتارىزدى 11 ۇيىرمە بالالاردىڭ وراسان زور قىزىعۋشىلىعىن تۋدىرۋدا. تەحنيكالىق شىعارماشىلىقتىڭ يننوۆاتسيالىق پاركىندە Wood art اعاشپەن جۇمىس, «ۆەرف» كەمە جاساۋ, «كرەاتيۆ» اعاش ۇستاسى, «كرەاتيۆ» كوركەم اعاش ويۋ, «بابالار ىزىمەن», ستەندتىك مودەلدەۋ باعىتىنداعى ۇيىرمەلەردىڭ جۇمىسى ءۇيىرىلىپ تۇر.
مەكەمەدە ءبىلىم الۋشىلار مەكەمەىشىلىك سايىستار, ترەنينگتەر, كينو كورسەتىلىم, شىعارماشىلىق كەشتەر, ءارتۇرلى كونفەرەنتسيالار مەن فورۋمدار جانە تاعى باسقا ءىس-شاراعا دا قاتىسادى. جاڭا ءبىلىم ورداسى اشىلعالى وقۋشىلار ءبىرشاما جەتىستىككە جەتكەن. بۇل سوزىمىزگە دالەل رەتىندە جاس تالاپكەرلەردىڭ وبلىستىق, رەسپۋبليكالىق, ءتىپتى حالىقارالىق دەڭگەيدەگى سايىستارعا قاتىسىپ, جۇلدەلى ورىندارعا يە بولىپ جۇرگەندىگىن ايتا كەتۋىمىزگە بولادى. شىعارماشىلىق باعىتتىڭ شىڭىنا شىعۋعا ۇمتىلعاندار رەسەي, بەلارۋس, لاتۆيا, ازەربايجان ەلدەرىندە وتكەن ءارتۇرلى بايقاۋدىڭ باس جۇلدەلەرىن الىپ ۇلگەردى.
سپورت باعىتىنىڭ ەركىن كۇرەس ۇيىرمەسىنىڭ بالۋانى الديار بالتاشەۆ بەلارۋس رەسپۋبليكاسىندا وتكەن ەستۋ قابىلەتى تومەن سپورتشىلار اراسىندا چەمپيون اتاندى, جاس فۋتبولشىلار قالا جانە وبلىس كولەمىندە اۋلا فۋتبولىنان توپتىق 3 ورىندى جەڭىپ السا, قازاق كۇرەسى ۇيىرمەسىنە قاتىساتىن ءبىر توپ بالۋان ۇلكەندى-كىشىلى بوز كىلەمنىڭ ۇستىندەگى بەلدەسۋلەردەن ولجالى ورالىپ ءجۇر.
مەديا باعىتىنىڭ تاربيەلەنۋشىلەرى دە ءبىلىم ورداسىندا العان بىلىمدەرىنىڭ نەگىزىندە رەسپۋبليكالىق سايىستاردا توپ جاردى. عىلىمي-ينتەللەكتۋالدى باعىتتىڭ وقۋشىسى تاميلا جابباسوۆا قورشاعان ورتانى قورعاۋ جانە تابيعي رەسۋرستاردى ءتيىمدى پايدالانۋ بويىنشا حالىقارالىق عىلىمي-ەكولوگيالىق فورۋمعا قاتىستى.
مەكەمەدە 114 پەداگوگ قىزمەت ەتەدى. ولاردىڭ اراسىندا ءوز ءىسىنىڭ مايتالمان ماماندارى – عالىمدار دا بار. ءبىر سوزبەن ايتقاندا, Bolashaq Saraiy بالالاردىڭ بولاشاعىنا كەڭ جول اشىپ كەلە جاتقان ءبىلىم باعىنا اينالىپ وتىر.
كوكشەتاۋ قالاسى