مۇرات ايتەنوۆ اقجار تۇرعىن الابىنىڭ حالقىمەن كەزدەستى

جەرگىلىكتى تۇرعىندار شىمكەنت-تاشكەنت ا-2 كۇرە جولىنىڭ بويىندا ورنالاسقان قوقىس پوليگونىنىڭ ماسەلەسىن كوتەرىپ, ونداعى جاعىمسىز ءيىس پەن تۇتىننەن تۇرعىندارعا كەلەتىن زيانداردان قاۋىپتەنەتىندەرىن ايتتى.

تۇرعىنداردىڭ وتىنىشىنە جاۋاپ بەرگەن قالا باسشىسى پوليگونعا تۇسەتىن تۇرمىستىق قاتتى قالدىقتار كولەمى كۇن سايىن 550-600 توننا, جىلىنا 200 000 توننا ەكەنىن ايتىپ, قوقىس پوليگونىنىڭ جۇكتەمەسىن ازايتۋ ماقساتىندا قالا اۋماعىنان تاعى ءبىر قوقىس پوليگونىن سالۋ ماسەلەسى بويىنشا ينۆەستور قاراستىرىلىپ جاتقانىن جەتكىزدى.

2014 جىلى قۇرىلعان پوليگوننىڭ اۋماعى 34 گەكتاردى قۇرايدى. ونىڭ اۋماعىندا اۋدانى 5 گەكتار بولاتىن قوقىس وڭدەۋ زاۋىتى ورنالاسقان. ال, زاۋىتتا سۇرىپتالعان قالدىقتار شۇڭقىرعا كومىلەدى.

سونىمەن بىرگە حالىق ورتالىق جانە ىشكى ورامدىق كوشەلەرگە اسفالت, سۋاعار جانە جاياۋ جۇرگىنشىلەر جولىن سالۋ ماسەلەسىن دە كوتەردى.

وسى رەتتە مۇرات ايتەنوۆ وتكەن جىلى تۇرعىن الابتاعى 8 كوشەگە شاعال تاس توسەلىپ, ەكى كوشە جارىقتاندىرىلعانىن, بيىلعى جىلى 29 كوشەگە اسفالت جول سالىناتىنىن ءمالىم ەتتى.

اكىم تۇرعىنداردىڭ باسقا دا ساۋالدارىنا جاۋاپ بەرىپ, ونىڭ شەشىلۋ جولدارى بويىنشا ءتيىستى سالا باسشىلارىنا تاپسىرما بەردى.

ايتا كەتەيىك, بەس مىڭنان استام حالقى بار اقجار تۇرعىن الابى ساپالى ەلەكتر, تابيعي گاز, اۋىز سۋمەن تولىق قامتاماسىز ەتىلگەن. ال, 2021 جىلى بيۋدجەت ەسەبىنەن 3 سپورت الاڭشا ورناتىلىپ, پايدالانۋعا بەرىلسە, بيىل 1 سپورت جانە 1 بالالار الاڭشاسىن ورناتۋ ءۇشىن قارجى قارالعان.