الماتى وبلىسىنىڭ تاعى ءبىر اۋىلىنا گاز تارتىلدى

بيىل تالدىقورعان ماڭىندا ورنالاسقان كوكتال اۋىلىنىڭ تۇرعىندارى تابيعي گازعا قوسىلدى. 

«كەشەدەن بەرى ون ۇيگە گاز تارتىلدى. گاز باعاسى - 31 تەڭگە 70 تيىن. قازىر باسقا ۇيلەردى قوسىپ جاتىرمىز», دەدى «جەتىسۋوبلگاز» جشس باسشىسى زياش قياقباەۆ.

بۇرىن اۋىل تۇرعىندارىنىڭ گازعا قول جەتكىزۋىنە قۇبىرلاردىڭ بۇزىلۋى كەدەرگى بولاتىن. اقىرى جوندەۋ جۇمىستارى جۇرگىزىلىپ, قاڭتاردا بارلىق اقاۋلار جويىلدى. قۇبىرلار بەرىكتىككە, تىعىزدىققا ارنالعان سىناقتاردان تولىعىمەن ءوتتى. ساپاسى تومەن ماتەريالدار الماستىرىلدى.

گازدى العاشقىلاردىڭ ءبىرى بولىپ وڭالباي جەكسەنبينوۆ ىسكە قوستى. ول وسى اۋىلدا 20 جىلدان استام ۋاقىت تۇرادى. ونىمەن بىرگە 77 جاستاعى اناسى كەنجەقىز كەنانوۆا مەن 82 جاستاعى اكەسى يساتاي يسانوۆ تۇرادى. ولار قۋانىشتارىن جاسىرا الماي, ريزاشىلىعىن بىلدىرۋدە.

«بۇرىن ءبىز كومىر تاسىپ, اعاش كەسەتىنبىز. ەندى بىزگە گاز قوسىلدى, بۇل تىرشىلىك ءۇشىن الدەقايدا ىڭعايلى. ءبىزدىڭ ۋاقىتتا ونداي بولعان جوق», دەپ ءبولىستى يساتاي يسانوۆ.

ايتا كەتسەك, جىل باسىنان بەرى وڭىردە 164 ەلدى مەكەن گازداندىرىلدى.