سەناتور ءالىمجان قۇرتاەۆ پالاتا وتىرىسىندا دەپۋتاتتىق ساۋالىندا دۇرىس ۇيىمداستىرىلعان ءتاسىل قولدانىلاتىن بولسا, حيميا ونەركاسىبى قازاقستان ەكونوميكاسىن دامىتۋدىڭ درايۆەرىنە اينالۋى مۇمكىن دەگەن پىكىرىمەن ءبولىستى, دەپ حابارلايدى Egemen.kz.
سەناتور حيميا سالاسىنداعى جوبالاردى باسقارۋ تيىمدىلىگىنىڭ تومەن دەڭگەيىن اتاپ, ءوز دالەلدەرىن ناقتى فاكتىلەرمەن بەكىتتى.
ماسەلەن, 2009 جىلى «سامۇرىق-قازىنا» قورى «بىرىككەن حيميالىق كومپانيا» جشس قۇردى. ونىڭ قىزمەتىنىڭ نەگىزگى ماقساتى - كاپيتالعا قاتىسۋ ارقىلى قازاقستاندا جاڭا حيميا وندىرىستەرىنىڭ دامۋىنا جاردەمدەسۋ. بۇل كومپانيانىڭ جۇمىسى ءۇشىن قوماقتى قارجى ءبولىندى, ونىڭ باسىم بولىگى - ۇلتتىق قوردان جۇمسالدى.
الايدا, سەناتور اتاپ وتكەندەي, وسى جشس قىزمەتىنىڭ بارلىق كەزەڭىندە جوسپارلانعان 21 جوبانىڭ تەك 6 جوباسى عانا ىسكە اسىرىلدى, بىراق ولار دا تولىق كولەمدە جۇمىس ىستەمەيدى.
«حيميا سالاسىنداعى جوبالاردى باسقارۋ تيىمدىلىگى تومەن دەڭگەيدە. بۇل سالادا ءتيىستى مەملەكەتتىك ورگاندارمەن ۇيلەستىرۋ شارالارى مەن جۇيەلى جۇمىس جوق. بۇگىن حيميا ونەركاسىبىنە تەرەڭ, ساپالى تالداۋ جاساپ, ناقتى باعىتتاردى انىقتايتىن ۋاقىت كەلدى. وسى سالاداعى بارلىق ينۆەستيتسيالىق جوبالار مۇقيات ىرىكتەلۋى ءتيىس», دەدى ءالىمجان قۇرتاەۆ.
دەپۋتات «بىرىككەن حيميالىق كومپانيا» جشس-ءنىڭ ودان ءارى جۇمىس ىستەۋىنىڭ ورىندىلىعىن قاراستىرۋدى جانە وسى سالاداعى ۋاكىلەتتى ورگانداردىڭ, عىلىمي مەكەمەلەر مەن قاۋىمداستىقتاردىڭ قاتىسۋىمەن حيميا سالاسىن دامىتۋ جونىندەگى ۆەدومستۆوارالىق كوميسسيا قۇرۋدى ۇسىندى.