«وسكەمەن-سەمەي» تاسجولىندا كولىك ورتەنىپ كەتتى

«09 اقپان كۇنى ساعات 21:00 شاماسىندا ۇلان اۋدانىنداعى تاۆريا اۋىلىنان 20 شاقىرىم جەردەگى «وسكەمەن-سەمەي» اۆتوجولىندا «سكانيا» ماركالى اۆتوكولىك ورتەنگەن. 38-ءوسب قۇتقارۋشىلارى كەلگەن ساتتە اتسەتيلەن باللوندارىن تاسىمالدايتىن اۆتوكولىك جالىنعا ورانعان بولاتىن. قاۋىپسىزدىك ماقساتىندا جول پوليتسياسى قىزمەتكەرلەرى اۆتوجولداعى قوزعالىستى ۋاقىتشا توقتاتتى. وقيعا ورنىنا اپاتتار مەديتسيناسى ورتالىعىنىڭ تراسسالىق مەديتسينالىق - قۇتقارۋ پۋنكتىنەن دارىگەرلەر باردى. زارداپ شەككەندەر بويىنشا اقپارات تۇسكەن جوق. كولىك جۇرگىزۋشىسى دە امان», دەلىنگەن حابارلامادا.

مالىمەتكە ساي, باللونداردىڭ جارىلۋىنا بايلانىستى ءورتتى دەرەۋ ءسوندىرۋ مۇمكىن بولمادى. تجد ءورت سوندىرۋشىلەرى الدىمەن قاۋىپسىزدىك تەحنيكاسىن ساقتاي وتىرىپ قاشىقتىقتا بولدى. جارىلىستار توقتاعان سوڭ ءورت سوندىرۋشىلەر باللوندى سۋىتۋ مەن ءورتتى ءسوندىرۋ ءۇشىن سۋ قۇيدى. ءورت 22 ساعات 35 مينۋتتا اۋىزدىقتالدى. ءورتتى سوندىرۋگە شقو تجد ءورت ءسوندىرۋ قىزمەتى جەكە قۇرامنىڭ 6 ادامى, 2 تەحنيكاسى جۇمىلدىرىلدى.